股海實戰：中國製藥醞釀大動作

希臘大選前，港股上周五率先炒高逾400點，主要動力來自憧憬「七．一」領導人訪港送大禮賀回歸十五周年。展望本周，希臘大選有結果，嚟緊G20峰會料將談及如何振興經濟及化解歐債危機，雲霧開始逐漸消散。月初阿莊話，本月股市亦危亦機，捱過首三周，過咗端午自見曙光，呢個睇法並未改變。

板塊方面，上周五喺憧憬北水南來之下，中資券商股成市場焦點。上周二阿莊話海通證券（06837）上車有心唔怕遲，走勢對辦，不妨放埋一邊釣大魚；價位相對細嘅國泰君安（01788）股價亦呈一浪高於一浪，一回又可以諗諗。

國藥大成交炒上

此外，上周亦見藥股有異動，國藥控股（01099）連續三日大成交，股價已抽穿50日線，直逼牛熊分界線。晒士較細嘅就有中國製藥（01093），上周初股價開始起動，公司證實與控股股東嘅聯繫人商談，有可能進行與藥業業務有關嘅收購事項，上周五股價曾高見2.15元，收報2.05元，升7.9%，成交4,098萬元。

早前中藥就中期業績發盈警，但月初以來股價由低位大幅反彈，累升六成有多，似在預告有大製作跟尾。

○七年，聯想控股透過旗下弘毅投資收購石藥集團，亦變相成為石藥旗下中藥嘅控股股東。今年初，聯想控股高層透露正準備喺五年內實現整體上市，估計此前料必着手重組旗下各項資產。再翻查資料，現時聯想控股旗下嘅弘毅投資，喺藥業方面有多項投資，除咗原料藥領域嘅石藥外，化學藥領域有喺紐約上市嘅民企─先聲藥業，而中成藥領域則有康臣藥業。橫睇豎睇，唔排除公司所講嘅收購係涉及同系嘅藥業投資重組，以配合控股股東嘅長遠發展策略。如今且耐心等候公布，睇睇今舖中藥能否藉重組併購概念大打翻身戰！