樓市出更：官舍地皮排隊登場

政府一再表明增加住宅土地供應嘅決心，並預告仲有大把地皮可以推出市場，事實上，政府仍然有唔少市區地皮彈藥。劉Sir收到風，產業署啱啱向地政總署交還黃大仙雙鳳街前慈雲山職員宿舍地皮，好大機會成為新增私人住宅供應，市場估計地皮市值超過17億元。

產業署交番畀地政總署嘅政府土地，係黃大仙雙鳳街57號前慈雲山職員宿舍用地，地皮面積約3.88萬方呎，响公屋慈樂邨隔籬，如轉做私人住宅，就畀到呢條邨嘅分支家庭多一個選擇。

由於幅地仲未改變用途，若果以附近私樓地積比率八倍計算，估計可以起到約31萬方呎，業界人士就估計，地皮市值可以超過17億元，即每方呎樓面地價約5,500元。

美聯（01200）何家豪同劉Sir講，幅地附近嘅二手私樓，有近年落成嘅滙豪山，該屋苑以用家為主，只得約莫10個放盤，最新1宗二手成交喺上個月中，為一個中層A室兩房單位，成交價超過390萬元，呎價超過6,200元。

荔枝角地鄰近豪宅

另一幅有待交還地政總署嘅政府宿舍地皮，係荔枝角月輪街前荔枝角焚化爐中心員工宿舍地皮，呢幅地隔離係曼克頓山，佔地超過7,500方呎，估計起到嘅樓面約6.7萬方呎，市值超過5億元，平均每方呎樓面地價近7,500元。

成交方面，中原陳靄華話，曼克頓山今個月暫只係錄得1宗二手成交，每方呎做價超過8,000元，現時屋苑二手每方呎叫價由8,000多元至1.3萬元不等。

觀塘香港仔地待還

產業署計劃今個財年交還五幅地皮，除咗上面兩幅地，仲有已交還作西鐵荃灣西站五區發展嘅荃灣運輸大樓，待交還嘅有作為觀塘市中心重建部分嘅觀塘政府合署及計劃重建做紀律部隊宿舍嘅香港仔前田灣職員宿舍用地。