23歲小子林達亨：炒股賺大錢 貪勝一鋪清

今次聚集了50名大學生的紅酒會搞手林達亨（Derek）本身只有二十三歲，他中四開始炒股，最佳成績是十個月內將本金翻八倍，結果年半前信錯貼士兼借孖展，一注獨輸過百萬元，現在他一半錢放在阿媽戶口，並發奮做獨立理財顧問，手下超過廿人，團隊剛為百名大學生準備暑期實習計劃，紅酒會是活動之一，目的非為「收o靚」跑數，而是要他們開竅。

十幾萬炒到八十幾萬

去年嶺南大學工商管理系畢業的Derek，三年多前邊讀書、邊做理財顧問，第一個月已跑到廿萬數，一年年薪賺80萬元，「嗰時搵到錢，好囂張，覺得自己識飛，走堂不在話下，請屋企人包車遊台灣使幾萬蚊，去美國搵女朋友又使十幾萬，買咗隻5萬蚊嘅Rolex獎勵自己，請同學食餐飯都七、八千蚊落樓！」

正職加上炒股一度令他賺大錢，Derek中四開始炒股，中七考經紀牌，一○年靠炒四隻細價股，將原來十多萬元本錢，炒到八十幾萬。「買貨前，我會上港交所（00388）網站睇貨源有無歸邊，大股東、散戶揸幾多；公司市值唔好大，十至廿億最好，太細就似殼股；公司要「乾淨」（負債低）；仲要睇兩、三年年報、一年公司新聞，加埋技術圖表。」

「我不是短炒，每隻都揸三個月，輸20%止蝕，但賺要賺一倍，其中卓悅（00653）九蚊買，十七蚊放，一隻股票已賺近30萬。」

嘗過甜頭後，結果是一鋪清袋。「收到貼士話一隻細價股會由七毫變個半，我有做功課，佢乾淨、貨源歸邊等條件符合，心諗手上80萬，加埋借50萬孖展，心諗130萬升一倍，即係成260萬，結果一鋪過輸過百萬，好大打擊！」

無控制注碼炒孖展輸突

Derek之後認真檢討，認為無控制注碼是最大致命傷，「如果買四隻股票，三隻贏、一隻輸，唔會輸突。依家我一半錢放喺阿媽度，少於三成錢買股票，其餘買基金，要分散投資，我計劃買樓收租，但樓價現水平太高，我唔會估樓價幾時跌，但我要準備好資金，只要機會一嚟，我就可以把握！」

Derek說自己是屋邨仔，父母在他六歲時離異，自小在單親家庭長大，因此他要把握每個機會，就算有廿個手下，自己都積極見客跑數，「如果我唔跑，搞到中層都淨係食over-riding（向下屬抽佣），咁最終邊個跑？我主要收入係靠自己！」