市場徐想:內銀股政策面好轉
近日內地將銀行資本新規推遲至明年一月一日實施!由於中國入咗世貿,佢就《巴塞爾資本協定III》實施嘅時間同方案都會與國際差不多一致,而且條約已較早前嘅版本有所放鬆,呢個消息絕對有利宏觀經濟面,特別係銀行股,只爭在唔知幾時會反映出來。
咁多間內銀入面,比較有資金壓力嘅要數光大銀行,其他內銀可藉住內部信貸評級、資產組合調整等成功過關。最穩陣嘅莫過於農行(01288)及中行(03988),資金壓力會比較細。
老實講內銀板塊目前已經幾便宜,尤其要數工行(01398)同中行等。「新規」目的都係想確保內地銀行有充足資本,令佢哋可以達致合理嘅信貸增長同埋鼓勵中小企貸款。呢幾個消息雖然唔係話國家大鑼大鼓咁放行,但政策面已經傾向正面。呢個誘因,有助於中期宏觀經濟增長,料內銀股好快會東山再起。繼續追蹤、出發!