股海實戰：華晨估值夠吸引

港股與外圍股市一樣陰晴不定，恒指昨又回落218點，衰到極之內銀股略為反彈，輪到內險及內房股有回吐，唯獨內地電力股強勢依然，再借階梯電價下月實施消息再炒高，三大國企電力股齊創五十二周新高，階梯電價其實已講咗幾個月，所以話炒消息亦要講氣氛同時機。

二三線股冇鑊氣

電錶股威勝（03393）亦屬於階梯電價概念股，因為多人家庭唔想畀多電費就要分電錶，所以威勝會受惠，但隻股尋日僅得萬二股成交，以前威勝平日平均成交都有一、兩球，反映呢排成交疏落已令唔少二三線股成為殭屍股，港股昨成交僅得382億元，由於希臘選舉在即，相信今日觀望氣氛將更濃。

思捷（00330）復牌再插12%，頂檔做主席嘅「柯大俠」話最緊要盡快搵番個新CEO，老實講，時裝股轉型唔同換季，未搵到新客可能已流失舊客。

阿爺七一送乜禮現時只能靠估，但金管局昨表示正與人行商討擴大人仔每日兌換限額等措施，不過今年至今人仔兌美元尚要貶值，提高限額唔會提高換人仔意欲。中資券商股亦為逆市奇葩，傳中信証券（06030）有意收購國聯證券，但更可能係憧憬阿爺七一後畀玩「半直通車」。

商務部公布今年汽車以舊換新原來以商用車為主，補貼金額由萬一至萬八蚊人仔，商用車呢兩年銷量大幅倒退，所以阿爺要扶助弱小，但商用車股如濰柴（02338）及重汽（03808）昨仍要下跌，乘用車板塊得華晨（01114）一隻微升，公司原本已未有受惠小排量汽車優惠政策，所以亦未有中空寶之嘆。

今年內地汽車整體銷量估計仍可保持微升，但五月國產乘用車價格則按月下降1%，阿莊在昨日講汽車代理股已分析過價格戰同庫存關係，高價房車雖然亦要減價促銷，但至少銷量增長理想可以彌補，合資生產寶馬之華晨首四個月銷量已增長47%，外資大行亦即時調高公司目標價。華晨今年預測PE約13倍，以公司增長率而言，已較估值相差不遠的其他汽車股吸引。