樓市出更：尖咀甲廈輸晒畀東九

近幾年九龍寫字樓買賣十居其九係九龍東觀塘等區，反觀傳統商業核心區嘅尖沙咀，唔少指標寫字樓買賣交投就大「插水」。綜合市場嘅資訊，直到今年為止，尖沙咀五幢主要甲級寫字樓買賣暫時加埋都只有24宗，同舊年同期相比，少咗超過五成，新東海中心更差唔多連續五個月「食蛋」。

有商廈投資老手同劉Sir講，九龍東唔少新建嘅寫字樓，無論設計同用料都可媲美港島甲級寫字樓，所以吸引好多用家同投資者入市，搶走唔少九龍傳統商廈嘅購買力。睇番美聯商業同坊間嘅資訊，今年觀塘萬兆豐中心已錄得21宗買賣，比上述尖沙咀五幢指標甲級寫字樓期間僅共錄約24宗買賣，足見唔少購買力已轉投東九龍市場。

尖沙咀交投縮五成

上述尖沙咀五幢指標寫字樓年內僅24宗買賣，少舊年同期逾五成，其中三幢指標寫字樓，本年至今為止，最少有三個月成交食蛋；其中新東海中心今年一月錄得一宗買賣後，至今再未有錄得成交，該成交單位位於高層，成交價近4,200萬元。另外，力寶太陽廣場除咗上月錄得兩宗買賣外，今年其他月份都無成交；而新文華中心今年亦只係四月份及五月份共錄僅三宗成交。

雖然同區有部分指標甲級寫字樓買賣成交較多，但都只合共錄到十數宗而已；其中，星光行今年每月平均都有買賣，五月份錄得四宗，本年至今合共暫錄十一宗成交，已經係區內買賣量較高嘅寫字樓。

東九商廈漲價15%最威

尖沙咀甲級寫字樓買賣悶局，做價亦唔理想，綜合市場資訊，本年至今，該區寫字樓呎價平均升幅只約半成，相比九龍東商廈樓價半年已升約一成半。有九龍東寫字樓投資者話，儘管九龍東新建寫字樓呎價已升咗唔少，靚啲嘅單位目前每方呎都約8,000元，不過，由於升值潛力較高，故好多投資者都集中留意九龍東市場。

美聯商業助理營業董事黃曉丹解釋，尖沙咀寫字樓業主普遍無出貨壓力，加上息口低，相信係尖沙咀甲級寫字樓買賣稀疏嘅主要原因。