牛熊對壘:博港股跌定吼69865

西班牙獲歐盟慷慨提供1,000億歐元的無條件援助,令全球魚缸亢奮一日之後,尋日已經迅速回復所謂的「理性」,周一晚美股開高走低,道指倒跌1.1%散場,恒指昨日低開234點,收市跌幅收窄至81點,主板成交降至415億元,買賣兩閒。

早幾日西班牙對意大利,合演咗歐國盃開波以來暫時水準最高嘅一場較量,結果一比一言和,不分高下。而係球場以外,兩隻歐豬兄弟亦都係拍住上,呢邊西班牙啱啱獲放水,市場就已將目標轉向意大利,兩國債息齊齊上升,歐債危機繼續係陰霾不散。

市場成交唔多,但留意到唔少公司一直密密回購股份,向好方面諗,股價低過帳面值,回購當然有利股東權益,亦代表現況未能如實反映股票價值,但股民當然唔可以咁單純,就此跟進買入,因背後可以有無限咁多個動機,就好似近排個別爆出醜聞的民企,亦同樣密密做回購,以圖穩定信心,成唔成功好難講。

窩輪整體成交按日升7%至64億元,佔大市比重升至15.4%,牛熊證成交就按日跌一成,至61.1億元。萬九關前有阻力,後市方向唔多明朗,較多資金轉炒個別窩輪,滙控(00005)窩輪最活躍,成交7.3億元,佔比高至11.5%。

淡倉資金佔上風

參考前日衍生工具資金流,隔夜坐倉的股民偏向睇淡後市,恒指認購證及牛證好倉錄得5,482萬元資金流出,認沽證及熊證淡倉同日見流入4,206萬元資金,此消彼長,熊證總街貨相對期指張數達4,687張,牛證街貨則只相當於2,508張,只及熊證近五成五的比例。

恒指波幅指數上周一飆升至33.39高位後,已經急速回落至30樓下,大市是升是跌,成交都一樣咁奀,反映市場實際無出現恐慌,只是投資者普遍心淡。從走勢來看,跌勢開始喘定,身邊的口痕友話,負面因素都已經反映得八八九九,認為再跌的空間有限,當大家情緒未見樂觀的時候,不如睇位小注牛證,恒指大和牛(69865)今年八月三十日到期,收回點數17,800點,槓桿比率14.9倍。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

藺俠