股海實戰：體育用品股有排唔使睇

西班牙銀行獲打救消息，對歐美股市之刺激唔夠一日就玩完，「歐債盃」仲好睇過歐國盃，市場話咁快由猜測「下一個希臘」轉移至「下一個西班牙」，大熱門當然係意大利。歐美股市隔晚升得咁短癮，但亦估唔到港股頂得住，恒指開市跌二百幾點，收市僅跌81點，港股一時強勢、一時弱勢難以捉路，唔少人更喜歡用牛熊街貨分布去測市。港股呢兩日除在亞洲區內股市屬於偏強之外，港匯亦強咗一段時間，昨日更因「白頭任」拋出脫鈎論而升至最高7.7538，其後官員一齊闢謠先至回軟到7.758。

風電股有留意價值

近期保持強勢只有內房股同電力股，事實係有根有據，大陸救經濟一定要救內房，俗語亦有話「房地產綁架經濟」，所以阿爺對調控樓市口硬心軟、只說不做，近期內銀又積極爭取房貸生意，傳聞首套房按息可以打到8折，昨再有5隻內房股創五十二周新高。電力股亦有兩隻破頂，煤價續跌及減息成兩大原因，下一輪可以睇埋風力發電股，雖然未能從煤價下跌當中受惠，但中央加快批出之基建投資，最多就係潔淨能源CDM項目，短期亦有間華電福新能源（00816）準備上市，此類股負債高最受惠減息。

南航（01055）獲注資升達6.6%，3大航空公司及南車（01766）先後有泵水，所以內銀不良貸款睇落好高危，但有阿爺擔保，幾時見國企破產？民企股則麻煩多多，昨又有寶峰（01121）、泰凌（01011）及李寧（02331）大跌，空軍搵食其實十分容易，可能一封匿名信已經搞掂，但青蛙王子（01259）回購有功，昨反彈近7%。

倫敦奧運下月又殺到，李寧四年前何其風光，老闆親身喺京奧開幕禮表演，體育用品股隨即亦升到巔，四年後嘅今日睇番真係不勝欷歔。李寧舊年業績已差到無倫，今年訂貨量、訂貨額同零售價全部仆值，可見清理存貨呢個問題有排都未能解決，板塊亦有排都唔使睇。

暫停擴張開店步伐

體育用品公司今年痛定思痛，暫停擴張開店步伐，部分甚至輕微收縮零售點，但幾大體育用品公司各自仍有超過7,000間零售網絡，要撥亂返正恐怕唔止一、兩年時間。就算擴充停止，但另方面仍動用大筆金錢做推廣贊助，內地傳媒報道李寧用20億人仔贊助未來五年CBA（中國職業籃球聯賽），籃球一向係安踏（02020）同匹克（01968）強項，但李寧用咁多錢踩人哋地頭，亦係另一種惡性競爭。