樓市出更：二手冷清另類盤獨旺

住宅盤源短缺，另類物業變得非常搶手，市傳九龍城栢德豪廷一個疑似事故單位以500幾萬元賣咗，低市價一成半；九龍灣德福花園亦有一收緊租嘅事故單位加價，並准買家睇樓，睇嚟另類單位都幾渴市。

住宅市場淡靜，反而事故單位等另類物業，以及舖位同車位等工商物業，陸續受到追捧；有代理同劉Sir傾開，話九龍城栢德豪廷一個疑似事故單位，市傳僅以500幾萬元成交，每方呎只不過6,000幾元，低市價超過約一成半，有業內人士稱，同類無事故單位估價六百多萬元，呢個屋苑近日有中層單位，以每方呎超過8,000元沽出。

海翠搶高仍未到價

劉Sir亦收到風，話九龍灣德福花園C座有個事故單位，一向都收開租，近排業主調高叫價，依家加價到280萬元放盤，呎價唔使4,500元，仍然低於市價，而業主家吓仲好似話可以安排買家睇樓，估計個叫價可以有得傾。

而個別另類單位有人搶但業主都唔肯賣，好似尋日屯門海翠花園6座中層一個疑似事故同層單位，尋日透過私人拍賣行推出，開價225萬元，並一度搶高到246萬元，可惜未到價被收番。

深水埗舖賣貴一成

除咗上述呢類另類住宅單位外，細價舖位物業同埋車位物業一樣受追捧，深水埗金華大廈深の都商場2樓一個單號舖位，尋日喺同一私人拍賣行推出，拍賣開價19萬元，最後以21萬元成交，比開價搶高達一成，呎價約9,545元。

另外同場亦推出荃灣朗逸峰2期相連車位，兩車位開價48萬元，獲買家出價競投，經過4口承價終以53萬元沽出，比開價高出一成。