股海實戰：財險一炮雙響諗得過

上周人行喺公布五月份CPI前兩日突然減息，結果實際數據顯示通脹一如預期受控，中央毫不猶豫出招救市，顯然係想把握時間出招避免經濟硬着陸。之不過，有別於市場預期只下調貸款利率，今次人行同時下調存款利率，且上調存款利率浮動區間上限及貸款利率浮動區下限，意味內銀嘅淨息差將受壓，中小型內銀所受影響尤大，故見上周五內銀股全線大飲茶，本來預計挾淡倉嘅場面未有出現，恒指跌175點收場，報18,502點，好友真係要認命！

空軍緊咬建行不放

早前曾見建行（00939）單日沽空額有12億元，上周五其沽空額亦有5.29億元，顯見空軍仍緊咬不放！內房係唯一一個明顯受惠減息嘅板塊，炒家至愛嘅恒大（03333），上周五彈7%，只係站喺炒波幅嘅角度，彈到上4.5元附近宜先行食胡。

表現中性嘅有內險股，事關減息周期開始，一般而言暗示魚缸將會有起色，見國壽（02628）、平保（02318）及財險（02328）均逆市升1%，阿莊手持嘅新華保險（01336）收報30.55元，升1.8%。

講開內險，受惠過去兩年嘅汽車產業補貼政策，財險嘅年度盈利由○九年度嘅17億元（人民幣．下同）增至去年嘅80億元，足見期間汽車業銷售大旺，對於主要從事產險，特別係車險業務嘅財險極為有利。早前有關部門宣布針對新能源汽車作出補貼，而繼減息後，相信尚會有一系列刺激經濟措施，包括傳聞已久嘅汽車下鄉補貼政策。汽車產業再獲國策支持，亦變相為財險業績買咗保險，只係由於比較基數已大增，盈利增幅會相對平穩。

今年首四個月，財險錄得原保險保費收入650億元，較去年同期增加9%，管理層指車險市場開放及行業競爭影響可控。去年財險完成供股，成功融資約50億元，有助增強資本實力。現價往績市盈率9.9倍，息率3.1厘，估值已回落至具承接嘅水平。

必須要一提嘅係，財險母公司人保集團擬發行A、H股整體上市。由於財險係人保集團主要盈利來源，相信喺整體上市前先將財險私有化嘅機會唔細。橫睇豎睇，財險現價估值買落揸得放心，又可以博吓私有化，一注錢叫兩飛，有得諗！