樓市出更：重建開快車市區趕拆樓

政府決意增加住宅土地供應，劉Sir睇番屋宇署最新資料，原來四月份該署一共批出咗17份建築物拆卸同意書，市建局項目就已佔咗4份，好似旺角「波鞋街」、黃大仙衙前圍村，同埋土瓜灣浙江街重建項目，都同時獲准進行舊有上蓋拆卸工程。而今年首四個月獲准拆卸項目就多達60個，比舊年同期增76%。

市區住宅發展密度較高，重建區內未用盡發展潛力嘅舊樓，可以得到最大嘅供應效益，劉Sir發現近排市建局非常積極開展市區重建項目。

「波鞋街」可建近24萬呎

屋宇署四月份批出咗17份建築物拆卸同意書，市建局就佔咗其中4份，包括籌劃超過十年嘅旺角「波鞋街」重建項目，呢個項目位於洗衣街、奶路臣街同花園街交界，舊年透過《收回土地條例》收回土地，地盤面積大約2.65萬方呎，可建樓面接近23.9萬方呎，未來會重建為富有地區特色嘅體育用品城。

而該局嘅黃大仙衙前圍村項目，亦有兩個地段取得拆卸同意書，其實喺二十年間，衙前圍村經已有部分由私人業主持有嘅物業被拆卸，市建局希望透過重建去改善村民生活，並盡量保留村內文物。衙前圍村同埋「波鞋街」呢兩個重建項目都獲批拆卸，劉Sir估計距離推出市場嘅日子唔遠。

至於另1份獲准拆卸嘅市建局項目，係其士國際（00025）及高剛發展喺今年二月份投得嘅浙江街/下鄉道項目，估計可以提供約116個住宅單位，有一半係面積約500方呎嘅中小型單位。

60項目已獲批准拆卸

今年已經有三個月份同樣批出17份建築物拆卸同意書，而今年頭四個月加加埋埋獲准拆卸項目就多達60個，比起舊年同期足足多咗約76%。睇情形發展局局長林鄭月娥真係言出必行，而市建局項目同私人發展商市區重建項目，相信係未來主要住宅供應來源之一。