金融小花財智大比試

股壇不乏靚女，有人認為她們是「花瓶」，今期《Sun Money》就出幾條金融問題考考三位「小花」，結果三人成績都中上，絕對唔係得個樣！

預留現金 吼抵撈

國泰君安投資咨詢部分析員 王昕媛

成績：答中3題(Q3-5)

自由發揮題：「投資有長有短，長線買咩股好？短線又買咩呢？」

王：「散戶入市前，最好做風險評估，了解自己的投資策略究竟是長抑或短。長線投資而言，應該買穩健產品，如iBond（通脹掛鈎債券）、公用及高息股；短線的話，就視乎大市氣氛及周期性因素，不要將資金買晒落一個股票板塊上，令風險集中，同時要留現金，準備大跌市時，仲有錢可入市撈底。」

王昕媛(Cyril)Profile

入行年份：二○○七年

現職：國泰君安投資咨詢部分析員

學歷：城市大學生物及化學學系學士畢業

投資經驗年期：五年

個人擅長研究股票板塊：基建股、內房股、煤炭股

投資組合：沒持有股票，主力投資物業

個人投資獲利最高金額：不方便透露

零售轉弱 勿沾手

華富嘉洛證券分析員 王婉庭

成績：答中3題(Q1、3及5)

自由發揮題：你點睇本地零售股前景？現時可唔可以撈底？

王：「我對零售股前景都睇得幾淡，因為內地個人遊增長難復當年勇，加上內地經濟增長放緩，人均消費力開始弱。睇番剛過去『五一』假期，本地零售股都炒唔起就知咩事，個人遊已經唔係零售股股價的催化劑。加上現時環球經濟混亂，我唔建議投資者入市撈底。」

王婉庭(Joyce)Profile

入行年份：二○一一年三月

現職：華富嘉洛證券分析員

學歷：美國柏克萊大學新聞及傳播學系學士畢業

投資經驗年期：三年

個人擅長研究股票板塊：珠寶股、化妝品股

投資組合：沒持有股票，現金為主

個人投資獲利最高金額：○八年於5元買入東風汽車(00489)，後於11元沽出獲利，賺得數萬元。

知己知彼 易翻身

新鴻基金融分析員 李惠嫻

成績：答中3題(Q1、3及5)

自由發揮題：「散戶炒股時要謹記甚麼？」

李：「第一，要清楚知道自己可承受的風險程度，切忌借孖展，以免市況大上大落時，畀大戶挾倉，甚至被迫斬倉；第二，因應年齡、教育程度、經驗去控制投資比重，後生仔當然可以炒短線，輸晒都有機會翻身，但年紀大的散戶就應該買藍籌喇；第三，按市況變動，隨機應變，嚴守止蝕位。」

李惠嫻(Hannah)Profile

入行年份：二○一○年八月

現職：新鴻基金融分析員

學歷：中文大學新聞及傳播學系榮譽學士畢業

投資經驗年期：六年

個人擅長研究股票板塊：高端消費股、石油股、金礦股

投資組合：沒持有股票，主要做人民幣定期存款

個人投資獲利最高金額：○八年曾經炒某隻股票窩輪，賺得15,000元利潤離場。