牛熊對壘：友邦彈力夠吼15871

連恒地（00012）主席李兆基都話，現時股市危險，唔敢買住，睇定啲先，一般普羅散戶更加對後市睇唔通。連續下跌四日的港股昨日出現反彈，高開188點後，最高升至18,412點，但高位乏承接，收市升幅縮至73點，主板成交奀到只有397億元。

昨日即市策略是開市後睇位買熊證，短線成功。截至周一止，恒指牛證街貨只有16.6億份，相當於2,921張對沖期指，重貨區17,600至18,099點之間的街貨超過11億份，現時最貼價的牛證是收回點數在萬八點之上，只有14隻咁多，熊證總街貨就有22億份，重貨區21,400至21,899點的街貨為6.7億份，跟恒指現水平有逾3,000點距離，大戶反手屠熊的誘因不太強，繼續劏牛的收穫又唔會好和味，看來本周有機會先炒吓波幅。

按隔夜坐倉情況，前日接近4,000萬元資金流入恒指Call及牛證的好倉，同時見4,754萬元資金流出淡倉。既然未能即時攻破萬八點，淡友食胡，未有追加淡倉的情況。

淡友食胡未有加倉

不過，唔Short亦唔代表要睇好，投資者似傾向相信短線回穩只是一個下跌裂口的回補，觀乎昨日走勢，成交少，無力升，完全是信心弱的一個反映。

昨日港股沽空金額33.8億元，佔成交比重終由一成以上降至8.5%，前日沽空最勁的友邦（01299）昨日繼續上榜，排名由首位跌至第二位，錄得1.1億元沽空額。其實，周一當股份被質到24元邊時即見買盤護航，由低位反彈上24.65元，接近全日高位24.7元收市，昨日更是主要上升的藍籌股，收市報25.2元，升2.2%。

雖然在一片跌市聲中，就算RSI跌至超賣區都不可盡信，因股份可以愈平愈見鬼，但友邦今年首季年度化保費按年增14%，表現勝同業，多間大行對其前景繼續投下信任一票，25元邊可考慮小注Call輪。友邦野村購（15871）今年九月二十八日到期，行使價26.5元，實際槓桿9.3倍，引伸波幅30%。