Fundman睇市：iBond回報勿過分樂觀

港股彈唔起，恒指升得73點，報18,259點，主板成交不足400億，唔單止基金買賣少，近排連大行報告都少，唯一安慰係大市沽空佔成交比例縮水跌至8.5%，反映逼近萬八關口，連淡友亦唔想再加注做淡。

iBond開始認購申請，唔少朋友都問筆者應否入番幾手收息。查實，內地通脹由去年高位6.5%，跌到四月的3.4%，估計五月數字或低過3%，隨着內地供港糧食價格回落，加上零售市道近期明顯受內地經濟影響，由熱轉冷，新一批iBond有港府預測全年通脹3.5%的等值回報，看來已是屬於樂觀。

對比紅簿仔息，估計有2至3%回報的iBond，對大部分習慣將錢存入銀行的普羅大眾，的確是穩賺不賠的好選擇。不過，以筆者的賭徒性格，對佢興趣唔大，主要建基於買iBond等同賭較高的通脹，才會有較好回報，萬一香港通脹真係升溫，最大機會的誘因，不外美國再QE，狂印銀紙推高全球通脹，或者內地經濟復甦帶動通脹拗腰再回升，但這兩個因素一旦出現，股市表現勢必好過債市，如果樂觀成咁，就未必會咁安分守己走去買iBond喇。

中信泰富估值低殘

澳洲昨減息四分之一厘，由去年十月至今，基準利率已由4.75厘減至3.5厘，市場估計下月議息，至少仲會再減四分之一厘。

澳洲高頻減息救經濟，對幾年前炒燶外匯，準備靠澳洲鐵礦石生意東山再起的中信泰富（00267）來說，確實時不我與。近期，內地需求放緩，山東鐵礦石價已較二月累積跌一成三，兼仲未有見底迹象，高盛早前先對中信泰富西澳鐵礦石項目的投產日期及成本預算表示關注，基於睇唔通揸錢乃股市金科玉律，其股價由二月中高位15.88元，至今累積跌三成一。

基本上，中信泰富股價與鐵礦石、中國放水消息掛鈎，上星期誤傳兩萬億救市，其股價一度彈上12元樓上，可惜升勢無以為繼。過去十年來，除炒燶匯一役，中信泰富○九年海嘯及去年下半年歐債危機，市帳率分別跌到0.52至0.55倍之間，今日則為0.58倍，開始進入可以博反彈的範圍，但大前提是，閣下要深信中國經濟及天然資源需求，於不日出現的放水行動後，仲有得救。

QR碼睇行情快又準

史提芬又有好介紹，為向讀者提供更多優質服務，《太陽財經》已將部分股市行情版資訊放到手機版網頁上，讀者可用智能手機的閱讀QR編碼應用程式，掃描行情表內的QR編碼，快速進入相關網頁，瀏覽包括派息備忘、沽空紀錄、大手成交等行情資訊，讀者更可掃描史提芬專欄內的QR編碼，查閱港股二十大升跌及成交即市資訊，緊貼市場脈搏。