股海實戰：上實漸具留意價值

尋日忽然傳來G7開緊急會議的消息，會唔會聯手做嘢穩住大局唔知道，但行動足以讓亞太區市場有喘息嘅機會。恒指最多反彈上18,412點，收報18,259點，升73點，成交僅398億元。內地商務部部長話，若內地經濟增速有繼續下滑之勢，中央自有對策，一副天跌落嚟當被冚、淡淡定有錢剩嘅樣子，股民真係要跟高官學習！

澳洲一如預期減息。隨着食品價格回落，內地CPI有望進一步下降，減息條件亦正在醞釀。次季內地發展商積極應對，促銷套現，回籠資金啟動新項目，故見五月份全國樓市交投回升。最新數字顯示，全國58個大中城市中，六成以上城市五月嘅住宅開盤量有明顯增加，其中有十三個開盤量環比翻倍增長，相信嚟緊內房股嘅五月份銷售數據有改善，短炒首選依然係恒大地產（03333）。

國美等1元樓下買貨

家電股國美電器（00493）股價一如所料繼續尋底，尋日反彈過上1.11元，但最後回落至全日低位1.05元收市，唔排除係有基金喺上月尾收咗息就沽貨離場，現時技術走勢極度超賣，想博一博，唔爭在等大成交插穿1元關先至落注。

大淡市幾好嘅股票估值都要大打折扣，好似盛傳內部鬥爭激烈嘅上實（00363），股價得番20.65元，市盈率僅五倍、息率逾5厘，真係要幾平有幾平！今年三月上實仲講緊擬收購房地產及水務項目，但四月開始高層大地震，究竟日後集團業務發展方向會否有調整，少不免令股價添上不明朗因素。

近年唔少大紅籌都一改守業作風，積極有為，如越秀地產（00123）搞房產、粵投兼營供水同商用物業發展項目、北控（00392）搞水務同燃氣業務，各自各精彩。觀上實近年亦明顯加大力度發展地產項目，但系內幾家公司業務重疊，外人難以摸清集團嘅地產業務策略。

近年上海市致力發展成國家主要金融中心，偏偏作為上海市窗口公司嘅上實，因紅籌身份沾手金融業限制多多。如今轉戰內房，配以基建同消費品業務，基礎四平八穩。股價落到呢啲位，除非有重大負面消息，否則長期捧場客亦沽唔落手。上實集團對上一次喺市場增持上實係喺舊年九月，均價21元，現價距之不遠，母公司會否喺適當時候出手增持，不妨等着瞧。