樓市出更：資金湧豪宅名人鬥手快

近排股市好似食咗瀉藥，不停咁跌，搞到樓市氣氛都受到影響，不過豪宅市場相對受嘅影響就較輕微，市場仍然有唔少名人、商家入市，好似太子珠寶鄧鉅明或有關人士，最近以7,180萬元買入西貢飛鵝花園一幢洋房，而老牌發展商永光地產譚逢敬或有關公司，最近亦用咗5,500萬元買入南區環角道18號一個頂層單位。

太子珠寶鄧鉅明一向活躍於豪宅市場，好似喺九龍站都持有過唔少單位，不過，劉Sir比較少聽到佢買西貢豪宅。

飛鵝花園售7180萬

據土地註冊處資料，飛鵝花園B段單號屋最近由超昌有限公司以7,180萬元買入，間公司董事包括鄧鉅明同蘇嘉寶。間屋面積約3,182方呎，花園約3,856方呎，現時呎價約22,564元，而原業主揸咗個間屋已經約莫十六年幾，帳面賺約4,815萬元。

至於永光地產譚逢敬或有關公司近期都入市，最近環角道18號2樓A室以5,500萬元賣出，買家係益通工程有限公司，而益通嘅董事除咗譚氏之外，仲有永光地產發展有限公司。聽市場代理講，賣出嘅2樓A室，面積約1,800方呎，呎價超過3萬元，係項目新高，而原業主前年九月以3,150萬元買入，期內升值2,350萬元。

環角道18號係一幢低密度住宅，總共得6個單位，舊年開始先後已經有5個單位賣出，每個成交價介乎3,080萬至4,000萬元，連同今次賣出嘅2樓單位，6伙成交價合共約2.38億元，現時6個單位分別由兩組業主持有。

山頂項目業主伺機放

據聞，永光地產或有關人士持有毗鄰嘅物業，市場估計，兩個項目有機會合併發展。由於優質豪宅依家仍然有需求，所以最近都有啲業主無懼股市波動，放售旗下貴重物業，其中山頂一個地盤總面積約13,966方呎項目，近期接受買家洽購。至於山頂區地皮放售一向唔多，好似舊年年初盧吉道31號就攞過出嚟招標，當時意向價約4.6億元。

雖然整體豪宅市況尚算平穩，不過，近期首現銀主盤嘅九龍站，最近都有啲業主願意減少少出貨。置業18陳港威表示，君臨天下1座中層B室，單位面積1,454方呎，經議價30萬元後，獲買家以4,120萬元連車位買入，呎價約2.8萬元，個單位○八年購入價3,180萬元。