牛熊對壘：建行跌唔落吼18554

歐債危機下，西班牙及希臘等前景不明朗，令意大利及西班牙國債債息再度抽高，而美匯指數亦升至超過一年高位，不過，港股尋日早上低開後，因MSCI指數調整成分股，令恒指由上午最多跌312點，收窄到收市下跌60點，同時成交亦急升至766億元。

尋日共有27隻牛仔被強制收回，當中24隻為恒指牛證，而牛證重貨區則仍然集中在18,200點至18,400點，涉及10.2億份街貨，相當於1,956張對沖期指。雖然港股尋日收市都唔係跌好多，不過早段曾經跌穿過18,600點支持，低見18,378點，創五月跌市以嚟嘅新低，故後市走勢未宜太樂觀。

喺成交急升嘅情況下，認股證及牛熊證佔大市成交比例都回落至個位數字，前者由12.5%回落至9.4%，而後者則由11.8%回落至9.1%。而窩輪資金流方面，近期因板塊氣氛差而走勢持續轉弱的中移（00941），Call輪獲資金追捧，單係周二及周三已錄得1,519萬元的資金流入，比期間流入恒指Call輪嘅資金仲多，而日前得到摩通增持嘅騰訊（00700），卻見資金追捧其認沽證，成為十大資金流入窩輪中唯一一隻put輪。

沽空比率仍偏高

雖然昨日沽空佔大市的成交比率較前日略為回落，但仍然高達12.3%，如果唔係MSCI因素令成交在尾市突然增加超過200億元的話，沽空比率相信會相當驚人。個股方面，建行（00939）嘅沽空金額高達12.2億元，沽空佔其成交比率高達兩成，而友邦（01299）沽空金額亦高達5.76億元。

雖然農行（01288）已確認其副行長被調查一事，但因為尋日四大內銀佔MSCI中國指數的權重獲上調，在基金急住追貨嘅情況下，農行避過一劫，收市倒升0.6%，而建行尋日亦在成交增加下現大陽燭，並一度上試20日線，收市升逾2%。事實上，建行股價經日前大幅調整後，暫時再向下的空間不大，看好的投資者，可吼建行法興購（18554），行使價5.48元，溢價7.9%，實際槓桿6.9倍。