股海實戰：康師傅未係撈底時候

尋日係MSCI調整前交易日，見MSCI中國指數權重獲上調嘅工（01398）中（03988）建（00939）農（01288）四行，股份成交明顯增加，尾市掃到甩轆。屈指一算，收市前十五分鐘大市成交急增251億元，全日成交增至765億元，乃三月十四日以來最大單日成交額。恒指喺三隻內銀抽高下，跌幅由最多312點收窄至僅60點，收報18,629點。

展望六月市況，阿爺經已率先出招穩增長，但咁做主要係抗衡歐債淡風，未必可因此令股市上升。再睇近兩周恒指14日RSI開始見到明顯背馳，技術上已具備反彈條件，問題係見到美匯指數短線調整後又再衝高，尋日高見83.19。總而言之，呢個月大家要做好心理準備魚缸會風大雨大，話唔定要等游完龍舟水先至轉運！

股價大幅跑輸同業

今年以來，食品股如中國旺旺（00151）同統一企業（00220）股價都跑贏大市，唯獨康師傅（00322）股價表現失去龍頭霸氣，今年以來最多跌28.5%，跑輸同業及大市。點解股價表現咁疲弱，近日公布嘅首季業績提供答案。

今年首季公司營業額同比降5%，至19.227億元（美元．下同），表面上純利增61%至1.98億元，但主要係季內與百事的戰略聯盟產生1.9億元收益所致，若撇除相關因素，純利倒退16%至1億元。事實上，季內原材料價格下跌，但純利仍現倒退，難怪季績公布後，多家大行即時調低其評級同目標價。

由於首季係飲料業淡季，加上庫存積壓，估計最快要到第二季尾及第三季嘅旺季帶動，始可望有起色，較明顯嘅復甦則好可能喺明年才出現。至於管理層話，民工消費力下降，致使低檔產品銷售增長較快，不妨留意同行情況，以評估係公司本身嘅銷售策略問題，抑或確實係銷售趨勢轉變。

最惡劣嘅情況，今年公司盈利原地踏步，現價市盈率三十一倍，喺內地消費市場增速同公司盈利增長「雙降」之下，現價估值尚有沽壓，估計心水清嘅大行們亦樂意踩多腳等執平貨，故阿莊預計，今年其股價低點可能會喺第三季才出現，想撈貨唔使心急。