樓市出更：舖王谷租建天橋引潮店

「舖王」鄧成波（波叔）近年頻頻買入多幢工廈搞活化增值，但佢始終對舖位增值興趣極濃，佢一向都會喺買入舖位後，再注加入新元素增值。劉Sir收到風，波叔四年前買入嘅荃灣大河道商場，早前已經搵咗承建公司入紙申請，喺商場1樓部分興建一小截行人天橋，連接途經該商場嘅一條行人天橋，若果獲批，商場嘅人流量一定倍增。有代理透露，波叔諗住引入電腦數碼產品新租戶。

有代理話，上述大河道10至20號登發大廈地下部分至3樓商場所在地，同連接荃灣港鐵站與西鐵站嘅行人天橋好近，其中商場嘅1樓部分與該天橋相距只有大約十呎左右。

申搭天橋 重組商戶

波叔同劉Sir講，之前已經同班工程人員傾過，問吓佢地嘅意見，如果喺商場1樓部分搭條行人天橋，與對出連接兩個荃灣鐵路站嘅行人天橋可行性，早排已經入咗紙申請。至於投資額多少，佢話係商業秘密。不過，可以肯定對整個商場租金都有好處。

不過，有代理爆料，咪以為波叔有番咁上下年紀，思想好老土，佢對潮流資訊好靈通，所以佢睇好電腦產品後市，所以早前待商場嘅租戶租約完滿後，寧願唔再放租，計劃重新引入電腦產品等新商戶。

據了解，波叔○八年初斥約1.68億元購入大河道10至20號登發大廈地下4A舖、1至3樓等樓面，總面積近約1.8萬方呎，多年來租戶以民生行業為主，包括特色麵食店、快餐店及電訊等。

藉新主題 提升租值

劉Sir認識波叔已有一段日子，佢睇商場真係好有眼光，懂得將一個毫不起眼嘅商場改頭換面，引入全新主題後，以提高租值，再善價而沽。佢○七年間以大包租形式承租油麻地彌敦道525至535號原倫敦大酒樓舊址，之後以數碼產品租戶為主，發展成MK1數碼廣場，大大提升物業租值，繼而○九年中斥約3億元轉租為買購入上址，一○年九月以近7億元售出，帳面大賺近4億元。