Fundman睇市：阿里巴巴再掀網股風雲

雖說希臘脫歐危機，牽動全球經濟神經，但從外電圖片所見，周末八國會議（G8）上，似乎各國領袖緊張拜仁同車仔場歐聯決賽，仲多過緊張希臘問題。G8無料到，周末歐盟委員會主席巴羅佐態度強硬如昔，對希臘緊縮要求，不會作任何重大妥協。另一邊廂，近日在選舉民調中節節領先嘅希臘左翼聯盟領袖早前走訪法德兩國，亦表達出準備好同歐盟坐低傾嘅意向。目前雙方猶如玩緊「膽小鬼遊戲」，歐盟同希臘一齊揸車衝向對方，在緊縮與脫歐的談判上，邊個煞車、扭軚或者落跑算輸，但見近兩日希臘左翼對緊縮政策立場有軟化迹象，似乎雙方最終玉石俱焚嘅機會唔大。

醜股博反彈揀馬鋼

上星期歐美股市高開低收，以為淡友會繼續左右大局，殊不知溫總一句「把穩增長放在更加重要位置」，多間大行即時揣測短期人行會再有放水行動，甚至會提早減息。毫無疑問，內地媒體報道本月上旬銀行新增貸款係零，加上四月份差到極的經濟數據，內地經濟放緩速度，看來出乎中央預期，難怪昨日港股雖然跌29點收市，但一眾缺水的醜股，包括鐵道及三四線內房股，唔少都出現極強力反彈。

阿爺會唔會落柯打逼銀行放水，是未知之數，但既然股市共識如此，房地產股外，史提芬認為高負債國企股，亦可博一博死貓彈，首先諗起嘅係隻馬鋼（00323）。事實上，建築及基建需求，可能要到下半年才會見到谷底。不過，過往經驗告知我們，馬鋼這類高啤打高負債國企股，最常有跌過龍的情況，經濟差及財政政策緊縮時，估值往往可以跌至0.3至0.4倍市帳率。反之行業周期中段，可見0.8至1倍估值，而高峰期或者極寬鬆的財政政策下，像○四、○七及○九年，更曾見過1.5至2.5倍的誇張水平。目前馬鋼一二年市帳率估計只係0.41倍，除非今年中國經濟硬着陸，否則現水平博反彈，應該是贏面大輸面細。

阿里巴巴（01688）母公司阿里巴巴集團，終以70億美元（約546億港元），向美國雅虎購回20%股權（雅虎仍保留20%），意味一年來爭吵不絕的糾紛，有機會畫上句號。

面書上市，互聯網資產有價，從分手費顯示，阿里巴巴集團整體價值至少350億美元，相當於2,730億港元，阿里巴巴市值668億元，大約係整體價值四分之一左右，可以預期，十八個月後重組再整體上市的阿里巴巴集團，將成為騰訊（00700）之外，基金經理第二隻內地重磅科網股之選，會否令沉靜的內地網股出現影子股效應，不妨拭目以待。

QR速查股市20大

史提芬有好料介紹，讀者可用手機掃描史提芬專欄內嘅QR編碼，查閱港股二十大升跌及成交即市資訊，緊貼市場脈搏。