股海實戰：中興未係撈底時候

當唔少人以為溫總開腔話要「穩增長」，港股點都會反彈三、五百點，點知又係失望而回，尋日恒指低開49點後反覆偏軟，最多僅升過1.8點，收報18,922點，跌29點，成交僅460億元。事實上，所謂「穩增長」言論流於空泛，短期內向股市開大水喉嘅機會唔大，即使啟動養老金入市又或者加大QFII額度，亦遠水難救近火，加上歐債危機會否失控，未來一個月乃關鍵，缸邊友唔係周身傷無能為力，就係惜本唔敢輕舉妄動，咁試問反彈動力從何而來？

內地要「穩經濟」並唔容易，外貿非中國所能控制，刺激內部需求來來去去都係家電、汽車等行業嘅補貼措施，至於基建，不離鐵路及城市建設，故見尋日相關板塊逆流而上，中鐵（00390）、中鐵建（01186）、南車（01766）升幅介乎3至6%。站喺國策概念，相關股份有望持續吸引避險資金進駐，但三大核心板塊：內房、內銀同內險股，就未見到有利好因素，足以支持股價擺脫弱勢。

屈指一算，以尋日收市價計，藍籌股之中，有超過一半成分股股價已跌穿去年八月低位，如果呢批股份繼續尋底，大部分都要睇番去年十月嘅低位。阿莊認為，去年末季嘅跌市，主要反映去年中以來內地經濟增長放緩對企業盈利所造成嘅影響，而眼前嘅跌市，則反映內地經濟增長連續五季放緩，對企業前景所造成嘅衝擊。除非能完全排除下半年內地經濟硬着陸嘅可能性，否則尚難判斷次季跌市是否已見年內低位。

要數殘股，內地電訊股除中移（00941）外，大部分都跌到一仆一碌。如聯通（00762）同中電信（00728），股價均已創五十二周低位。至於電訊設備及手機龍頭股，尋日中興通訊（00763）曾低見15.18元，乃自○九年七月以來嘅新低，14日RSI落到21。跌得咁殘，除咗受板塊淡風影響外，最近公司證實其一款銷往美國嘅手機存在安全Backdoor漏洞，亦成為沽售藉口。

盈利倒退派息減

過去中興有唔少長情基金坐貨，近期股價持續向下，但睇番其沽空比率未有異樣，相信跌勢唔係空軍所為，而係基金沽貨套現所致。引發基金逃亡，主要係過去幾年中興業務處上升軌道，年年都派息兼送紅股，但去年度盈利倒退，派息減少兼停送紅股。公司派發末期息每股0.2元人仔將於下周二除淨，基金唔等收息就決心沽貨，可見有幾睇淡公司嘅前景。所以阿莊認為，呢隻股短線有技術反彈唔出奇，但別期望太高，中長線而言尚未到撈底嘅時候。