樓市出更：荃灣廠地起甲廈仲值錢

半世紀前嘅香港，針織及製衣業等十分蓬勃，廠房遍布各區，不過，隨着經濟轉型，房地產業嘅發展，發展商都將丟空多年嘅廠房重建，以提升物業價值。好似嘉華地產持有數十年嘅荃灣富華織造廠舊址，多年前曾一度想重建做酒店，但最終決定拍板起甲級寫字樓，將成為該公司响新界區首個寫字樓物業。

嘉華國際（00173）營業及市場策劃董事陳玉成（Wilson）同劉Sir講，上述荃灣沙咀道2至6號富華織造廠，樓高大約兩層左右，十幾年前已經無再運作，公司都有諗過起酒店，亦搵過則師計數可以起幾多間房、坐向同設計應該點樣。

同區競爭 酒店無優勢

有代理老友話，二○○三年個陣上址獲批建酒店，可建一幢24層高酒店，提供房間大約500多間，適逢當時內地個人遊來港日增，酒店房間需求大，酒店物業吸引唔少財團注意，發展商亦曾經放售過上址，並吸引差唔多廿個財團興趣，先後到現場睇睇，可見上址有其吸引力。

不過，Wilson話，由於荃灣區已有大型酒店落成，提供逾千個酒店房間，故依家上址改建酒店嘅優勢大減。反而，近年上址附近有多個新建工貿項目相繼出售，並錄得不俗銷售成績，所以該公司決定將上址重建為寫字樓，相信投資價值會較大，至於日後會作出售抑或出租用途，就言之尚早。

ONE MIDTOWN呎價四千六

據悉，上述沙咀道寫字樓重建項目，地盤面積大約3.47萬方呎，而可建樓面大約34萬方呎，樓高20層。睇番近排由會德豐地產發展嘅海盛路工貿物業ONE MIDTOWN銷情理想，至今已賣咗超過九成樓面，日前加推嘅42樓單位，最高呎價去到4,693元，挑戰區內同類物業新高，反映區內工商物業前景亮麗。