股海實戰：跌浪幾時完要睇美匯

月初恒指抽上21,000點樓上，呃咗好多本來做淡嘅散戶落疊調頭做好，本來恒指跌穿兩萬點彈也不彈，好友唔平倉都要減磅，偏偏唔少係「死牛一面頸」，結果呢幾日過百隻牛仔被宰，月初反手揸期指就輸足兩千點有多，真係財散人安樂！

內地傳媒報道，四大行五月份首兩周新增貸款幾近零增長，且存款在不斷流失。尋日滬綜指跌28點，收報2,346點；深成指則失守一萬點關，報9,916點。本港內銀股全線大飲茶，民行（01988）跌6%，內險股則以大熱倒灶未能進身MSCI系列指數成分股嘅新華保險（01336）跌得最甘，跌幅8.2%。藍籌股中，中移（00941）亦撐唔住，跌幅3.65%；盛傳擬出廿蚊3G計劃嘅中國聯通（00762）跌幅更達6%。

中國城軌出師不利

此外，之前講過強勢股轉弱係為睇淡後市又一大理由，見聯想（00992）未能重上50日線後繼續向下，尋日低見6.51元，好在之前排隊冇中獎！另一隻強勢股中國食品（00506）尋日亦大成交插一成。驟眼睇真係冇咩股票買得落手。一線股如此，二、三線股唔使多睇。呢個月股價係咁放紙鳶嘅盛明（00231）一下子挫22%；剛掛牌嘅中國城軌（08240），收市價較招股價低27%。

依家有錢最好留番喺袋傍身，皆因未來幾個月本地經濟會明顯轉差，就業市場不景勢必打擊消費意欲。望見眼前劣況，阿莊想起舊年六月，恒指仲有兩萬三千幾點嗰時，一位城中著名莊家話，一二年股市「仆硬」﹗呢句說話阿莊好上心，呢一刻亦慶幸自己一直有警惕。年初有人問阿莊，點解近年個組合咁保守，買賣次數咁少，阿莊回應係，買賣目的不外乎係賺錢，阿莊已非魚缸新丁，深明投資必須要懂得審時度勢，唔係搏命嘅時候，就應該少做少錯，珍惜銀彈，為咗「娛樂」出出入入十賭九輸哪有意思？如今睇嚟自律可以避劫。

睇番後市，究竟呢個浪跌幾時完？阿莊奉勸各位睇實美匯指數。上周四阿莊話美匯指數有機會抽上81，尋日經已升到上81.53，今轉或會突破今年初高位82，之後會再升定係見是浪高點而回落，乃後市關鍵，且快有答案。大概美匯指數調頭回落，就係股市得以喘息甚至作出反彈嘅時候。