樓市出更：二線龍頭舖炒上一線價

銅鑼灣一帶地舖爭崩頭，區內再有地舖被投資者高價收購，正正喺時代廣場對面嘅霎東街9B號地下1號舖，早幾日以8,100萬元賣咗，有代理同劉Sir講，個舖建築面積大約400方呎左右，折合呎價超過二十萬元，雖然唔係該區新高，但以該區二線街舖計，已經係好好價，足見新買家對該區發展充滿信心。

銅鑼灣一線街舖買少見少，唔少投資者睇好區內後市，呢幾年開始喺區內二線街尋寶，斥巨資掃地舖，睇番土地註冊處資料，上述霎東街9B號地下1號舖上個禮拜賣咗8,100萬元，買家係POSITIVE RESPONSE LIMITED，如果以建築面積約400方呎計，呎價大約20.25萬元左右。

重建影響 商戶鄰街爭舖

尋日劉Sir落咗霎東街現場，該地段大部分租戶以經營時裝為主，據悉，部分現有商戶數年前自對面街遷入，部分則已經營達十多年不等，預計未來唔少區內商戶都會因重建或加租，「打游擊」嘅現象將日趨普遍。

事實上，近排銅鑼灣二線街舖屢錄理想價成交，英皇國際（00163）執行董事張炳強早前話，該集團於勿地臣街12號地下一個麵包舖，涉資大約1.46億元，呎價都要二十萬元左右。有代理話，由於二線龍頭舖開始炒起，相信做價仲有得升。

銅鑼灣希慎廣場就快開張，唔少商戶盡最後努力搶舖，劉Sir收到風，有間鐘錶行同化妝品店同時斟緊預租啟超道一個地舖，業主新租金約150萬元，同現租金比高出超過兩倍。

樓上舖搶手 漲租近兩倍

區內地舖租金倍增，亦帶挈樓上舖，有代理話，舊年樓上舖租金平均升幅差唔多七成，有啲仲以倍數增加，如區內白沙道有個雙號低層單位，啱啱畀時裝店以每月大約5.5萬元搶租，比起之前租金勁升超過1.7倍。

至於一線舖租續理想，金朝陽（00878）執行董事陳慧苓同Sir講，旗下銅鑼灣羅素街金朝陽中心共6個地舖，當中4個今年租約期滿，並由國際時裝及鐘錶品牌各承租兩舖，比起舊租金以倍數上升；樓上舖亦有超過20%樓面年內需續租，續租租金每呎逾50元水平，物業現時整體出租率近100%。