股海實戰：六絕當前後市難樂觀

遲來嘅降準行動，果然無辦法扭轉股市弱勢。尋日滬綜指跌14點，收報2,380點。港股表現更差，恒指高開72點後，兩萬點一瞬即逝，午後跌幅進一步擴大，結果收市報19,735點，跌229點，成交519億元，缸邊友都睇到頭擰擰！

點解今次人行出招市場反應會咁差？過去中央撐經濟好積極，多數會揀喺經濟數據公布前先落藥穩人心，但今次市傳降準行動，由拜山講到「五．一」黃金周都過咗個幾禮拜，兼且喺一大堆差強人意嘅經濟數據出爐後才成為事實，明顯一改過往嘅作風。阿莊絕對唔會懷疑中央政府嘅施政能力，反而相信苷官方變得咁被動，係預視有更大嘅難關在後頭，且變數非中央政府完全可以控制，所以採取「拖」字訣，拖到冇得再拖先至出招，免得出手太快浪費彈藥。但連祖國都變得咁審慎，試問怎能令人安心？

聯想失守50日線

事實上，唔單只係指數，睇睇強勢股，騰訊（00700）已第六個交易日收喺10日線樓下，14日RSI表現疲弱；聯想（00992）年初以來嘅升浪調整未曾試過失守50日線，上周亦終告失守，輕微反彈過後，尋日又再次失守。個股強轉弱十分之明顯，係睇淡後市又一有力理據！

再睇技術走勢，尋日恒指連跌第八日，走勢疲弱，短線確認上唔番兩萬點關，後市下試19,000至19,200點水平機會頗大，且嚟緊一浪跌勢可能會轉急。總括而言，今年「五窮」已成，「六絕」在後，各位宜及早檢討持倉風險，自求多福！

廣藥沽得早揼心

後市唔樂觀，但也有跌市奇葩，廣州製藥（00874）係其中一隻，尋日曾高見12.66元，收報11.88元，升14%，一諗起沽早咗嗰種感覺仲慘過輸錢！但母公司打贏官司一事，外人好難預計到，食胡永遠唔係錯，錯就錯在冇因應其後嘅利好消息追番啲貨！

腳踏實地啲，尋日提到萬一環球股市再大崩圍，可以買領匯（00823）同兩隻電力股避險。咩都唔想做嘅話，行埋一邊耐心等年中Big Sale，收租股中，可（目及）實希慎興業（00014），事關旗下希慎廣場會喺今年夏季開幕。

本來港鐵（00066）現價估值已某程度反映加價申請不明朗以及檢討票價機制一事，但最近沙中線落實撥款，消息利好但股價亦冇反應，反映短期弱勢持續，繼續冷眼旁觀，等落番24元水平再認真諗諗。