樓市出更：二手樓計實用面積等一年

二手樓統一用實用面積計價勢在必行，不過磨合期要幾耐就未有結論，早排有業界話要兩年適應期，地產代理監管局亦話今季內會向地產代理發出二手物業實用面積嘅執業通告。劉Sir收到風，執業通告最快今個月底揭盅，但正式實施日期相信會係一年後。

劉Sir收到消息，二手物業實用面積嘅執業通告，已經進入條文最後審視同翻譯階段，相信最快本月底會公布。而地監局揀呢個時間，劉Sir相信係同下個月初八大地產代理商會舉行例會有關，因為可以順便一次過見晒啲商會，講清楚條例細節同局方要求。

至於業界最關心嘅兩件大事，包括條例正式實施時間，同埋點樣搵番個二手住宅單位嘅實用面積。有線人同劉Sir講，《一手住宅物業銷售條例》係响草案通過後十二個月左右實施，等業界同市民都有一段合理時間熟悉條例，咁二手物業實用面積嘅寬限期，應該同一手樓一視同仁，即係一年後先實施。

上網查閱收費要傾

劉Sir亦收到料，運輸及房屋局都留意到地產代理業界有關《物業資訊網》內查察住宅物業實用面積收費、同埋係咪開放嘅意見，局方已經將有關嘅意見，轉交咗畀差餉物業估價署考慮。

世紀21奇豐主席及行政總裁李峻銘（Eric）就覺得，二手樓用實用面積呢樣嘢係大勢所趨，不過，政府仲有啲細節未解決，好似用差餉物業估價署嘅數據，定係用發展商發售時嘅實用面積計數，市場暫時未有統一標準，而且個個單位都要用錢去查實用面積，點令市場透明同開放？

代理冀有兩年適應

Eric仲話，如果政府開放《物業資訊網》，唔使一年，三至六個月佢哋都可以配合到新例，否則就只會為市場製造混亂。地產代理商總會主席朱姐（朱建蘭）就話，一年太短，最好有兩年適應期。

理大教授許智文覺得，一年唔長唔短啱啱好，佢預期條例實施頭三至六個月，代理會有啲混亂，適應咗就可以解決到，仲可以幫手教育業主同買家。