Fundman睇市：社保學淡馬錫東施效顰

恒指5連跌，但喺尋日亞太股市中已算跌得少，主要靠中移（00941）單天保至尊，其次係首季業績對辦嘅滙控（00005），恒指距離上月低位仍有300點，但國指已經穿底，民企股及二至九線股更加慘情，散戶嘅損失並非睇恒指千幾點跌幅可以概括。

希臘左翼揚言不履行救助條款，嚇到全球股市再冧。其實事件並非無轉圜餘地，事關籌組聯合政府一拍兩散嘅機會相當高，到時又要再舉行國會選舉。弊在目前人心虛怯，歐股昨早段僅德股保持不失。

恒指已跌穿250日線，剩得100日線未穿，短期支持係保力加通道底部20,127點及上次低位20,035點，港股由中移獨大更有托住嚟沽嘅味道，當中移係公用股來解釋升因，但其他3隻公用股一樣要跌。中移主要靠4G孭飛，但潑冷水講句，中移推3G之後ARPU一路跌，香港4G收費都唔高得過3G，隨時係想像美麗、現實殘酷。

外電報道，「十八大」可能要押後到今年底或明年初，有分析話中國遲遲唔放水都係驚換屆前會加劇通脹，如果真係押後，亦可能代表放水跟住會推遲。

散戶不宜買股票

滬深300指數尋日跌1.9%，插曲係前日中證監主席郭樹清話新股發行「把投資者當傻瓜」，剛退休之明星級基金經理王亞偉話「散戶不適合買任何一隻股票」。股民可能覺得好刺耳，但現實係香港股民除咗○三至○八年大牛市外，長線贏錢嘅股票十中無一。

曾幾何時風光過嘅六福（00590）、東表（00398）同I.T（00999），尋日齊齊創五十二周新低，同胞一減少消費即告現形，唯一寄望係CY上場後，阿爺會再送禮放寬一簽多行。六福前兩次跌穿20蚊都有大反彈，但今次冇金價撐住，六福往年盈利大增部分係靠黃金庫存升值。

今日恒指季度檢討，要睇吓思捷（00330）有冇得留低，集團收市後公布第三季度營運數據續有改善，但歐洲呢排再起波瀾，歐元再跌穿1.30，前景再打問號。

南車（01766）畀社保基金玩死，社保低買高賣想學淡馬錫乎？但社保一買一賣只係賺得50萬，而淡馬錫上個禮拜趁高走咗一批內銀股可稱時機一絕，最慘係上次跟社保上「車」嘅散戶。

潮流電子產品概念股多籮籮，但得瑞聲（02018）一枝獨秀，另外一隻超強嘅股係TCL多媒體（01070），雖然創完新高後倒跌，但今年累計升幅已有一倍，集團一○年見紅皆因互聯網電視被叫停，但如今經已重生，所謂互聯網電視、智能電視以及最新嘅雲電視都係同一概念，但就愈賣愈貴，連聯想（00992）亦宣布推出智能電視產品，最平都要六千五蚊人仔，最貴萬五蚊人仔，賣到咁貴，完全唔同平板電腦及手機以低價搶佔市場策略，但其股價最近連續三日大幅滑落，投資者似乎唔係咁buy。