股海實戰：蒙牛揸長線食大茶飯

恒指確認失守牛熊分界線，觸發投資者決心減倉，故見大市成交回升至552億元，恒指收報20,330點，期指撇除除息因素嘅理論價，實際低水16點。此外，國企指數本周已先後跌穿三月底及四月初嘅低位，一旦滬綜指再次失守2,400點關，國指頗大機會下試10,000至10,200點水平承接。

過去美匯指數走勢與股市表現有一定關連，今年四月美匯下跌，股市氣氛則有改善。但自四月底以來，美匯指數已由約78.6回升至80，月內有機會抽上81，意味股市仍有下跌風險。再睇恒指走勢，尋日失守250日線，14日RSI處40，MACD確認牛轉熊，橫睇豎睇應該仲有得落，看官別心急開好倉。

提防民企風暴重臨

繼續留喺股市嘅股民，要提防未來兩季企業盈警將成大戶宰牛工具，首季民企股風暴亦有機會再次捲土重來，揀股長揸短炒都好，要過到盈利表現同資金身份呢兩個關卡，先至好放心沾手。

講到民企股，之前毒奶事件中，蒙牛（02319）可以話係因禍得福，皆因本身係民企股，但自中糧入主後被染「紅」，有大支水喉射住，唔使驚有人「渾水摸魚」﹗

中糧高層早前表明不滿蒙牛過去三年嘅表現，不久即傳來由喺中糧系統任職多年，精於品牌食品營銷及管理嘅孫伊萍空降出任蒙牛總裁。阿莊認為，以中糧嘅人才、經驗同資源，要搞好蒙牛，係有心有力，相信年內蒙牛會落實投資上游牧場項目，從奶源入手根本性解決產品質量嘅問題，而待整頓好生產問題，下一步就係做重塑品牌工作，過程可能要一、兩年時間，但成績值得期待。

近年蒙牛業績已重拾增長軌道，現價往績PE二十一倍，以一隻身處高增長市場和背靠國家級糧油食品集團嘅消費股嚟講，估值唔係貴，短線受市況所限拉「牛」上樹升幅有限，頂多都係跑贏大市，但若然肯揸長線博食大茶飯，值博率吸引。

Tip股我至Top

暴炒男（5/4）Tip匯銀家電（01280）最多升10%

錢進（5/9）Tip瑞聲科技（02018）最多升5%