樓市出更：甲廈頂租潮湧到嚟

歐債危機「有壓力，未解決」！唔少响香港嘅國際金融機構都開始縮皮，將租用緊嘅寫字樓單位推出搵客頂租。劉Sir打探到，依家中環就有約10個甲級寫字樓頂租盤，涉及樓面共約9萬幾方呎。好似國際金融中心1期一個低層單位擬用市價推出頂租，每方呎叫租大約130元，月租約260萬元。

劉Sir收到風，目前中環寫字樓頂租盤雖然得10個左右，涉及樓面少過10萬方呎，不過該等租戶都係國際金融大企業，斷估都唔會貿然提出頂租，劉Sir覺得可以解讀為公司對後市未敢樂觀，難怪唔少代理都預測，今年寫字樓租金有約10%下調壓力。

國金二期內資市價接

現時寫字樓頂租主要集中喺中環等商業核心區，由於現有單位簽咗約一段時間，業主都會以現時市值租金作參考酌量調高，一般約5%至10%左右。有消息話，上述國際金融中心1期低層單位，面積約2萬方呎，租客原為跨國金融公司，目前意向呎租約130元，月租約260萬元。

又好似原本由會計等相關財務公司租用嘅同區盈置大廈低層全層，面積約9,970方呎，單位擬以市價推出頂租，月租約84.7萬元。

中環未來新增寫字樓供應少，個別優質頂租盤「皇帝女唔憂嫁」。消息稱，原本由外資基金租用嘅國際金融中心2期中層單位，租約今年底先滿，近排推出頂租，短時間即獲內地企業承租，呎租約160元，月租約107萬元。

全球商廈投資首季跌21%

威格斯何繼光話，中環甲級寫字樓大租戶唔少係國際金融機構，歐洲經濟疲弱，在港業務難以獨善其身，部分要短時間縮減成本，所以近月市場多咗頂租盤。佢估計今年環球經濟仍然波動，本港寫字樓頂租情況有機會增加，仲會擴散至非商業核心區。

環球經濟放緩，仲量聯行一份報告話，今年首季全球商業房地產直接投資額，按年下跌21%，而亞太地區有關投資額亦只有200億美元，較去年第四季及同期，分別大減80億元及70億美元。