牛熊對壘：港交所沽壓重敲14881

市場經過周一的「狂風暴雨」後，昨日仲係陰陰沉沉，恒指高開低收，全日波幅248點，成交縮番去500億元都唔夠，焦點放喺幾隻公布業績的重磅股身上。

滙控（00005）首季業績按季增長9%，遜於預期，但核心盈利表現好過預期，股價暫時企得穩，惟昨日沽空榜上滙控排頭位，錄得1.63億元沽空額，佔總沽空4.26%，反映唔少人對大笨象缺乏信心，份成績表實際又未好到可以扭轉未來觀感，加埋政治出現變局的歐洲又佔其業務不少比重，都係審慎為上。尋日滙控認股證非常旺場，活躍度僅次恒指，錄得9.6億元成交額。

港股收市跌51點，即市低位20,399點，剛觸及街貨密集區的邊緣，共20隻牛證被打靶，當中12隻是恒指牛證，估計涉及約3億至4億份街貨。截至周一，不少睇勢走位的股民衝入博牛，當日恒牛街貨增加9.5億份，總街貨37.8億份，熊證總街貨減少1.4億份至21.6億份。大戶手起刀落一路屠牛，好友雖節節敗退，但似乎對後市反彈抱有希望，周一牛證重貨區街貨超過15億份，較熊證重貨區街貨10億份多出一半。

新地窩輪需求大

牛熊證成交唔到60億元，按日跌12%，窩輪成交亦只得65.51億元，較周一跌6.4%，加埋佔大市比重27.9%。新地（00016）不是昨日跌得最多的地產股，但股價跌吓跌吓，話咁快去到七個月低位，相關認股證成交再增，接近1億元，就算有Put輪槓桿低至一倍多一點，都一樣有人吼，可見需求幾大。

另一重磅股港交所（00388）派首季成績，唔好係意料中事，季度盈利11.48億元，按年跌7%，多間大行齊齊發功，吹水睇淡，大摩維持「減持」評級，目標價睇100元。總裁李小加出身投行，說話技巧好高超，繼續大Sell競購LME大條道理，但都無助港交所的短線壓力，股價二月見頂後，一直沉底，120元邊頂得幾耐好難講。認為短線會再跌的，可留意港交麥銀沽（14881）今年十二月四日到期，行使價120元，實際槓桿4.3倍。