Fundman睇市:東風增長動力無懷疑

喺日韓台星泰尋日全線回升之下,前日跌得最勁嘅港股,卻做唔成「復仇者」,尋日先升後跌51點,認真令人失望。收市後滙控(00005)公布首季業績按季多賺9.4%,低於市場預期嘅雙位數,雖然「英國象」股價仍比本港收市價高1蚊有多,滙控季績差,但核心盈利又高過預期,只係睇你點去解讀。

恒指250日線失而復得,但其實冇乜參考作用,港股自二月尾見頂之後,其實一直未有較明確走勢,喺向上或向下突破前,成交相信只能維持悶局。外圍股市亦相當反覆,法國及希臘新政府如何運作只係靠估,短期拍債結果會係新指標。

新地(00016)卒之跌穿90蚊,俗語話接下跌中的刀好易損手,但點計風險度都低過博華寶(00336)、國美(00493)等民企股,尋日亦有近億資金博新地輪刀仔鋸大樹,但公司單case有排搞,淨係輸時間值都好襟計。

減成品油價機會大

國際油價上周五跌穿100美元後反彈乏力,內地減成品油價再無懸念,傳最快會喺今日。油價跌反映對經濟前景悲觀,但油價跌亦減輕通脹壓力,從而有利經濟復甦,以此推斷油價未來升跌幅度都係有限。

油價升跌對兩大煉油股好難清楚講好與壞,但航空股肯定歡迎低油價,內地三大航企近日股價中興,但最勁仍係首都機場(00694),股價累升四成,惟其客運量已接近飽和,傳聞第二新機場已選定落戶大興區,將於一五年首航,並成為全球最大機場,追首機嘅股友亦要密切留意進展。

汽車板塊昨日見異動,主要係借住剛結束之北京車展炒一轉,而內地次季汽車銷量如無意外可重現增長,何以咁有信心?皆因舊年同期遇着日本海嘯蹂躪,日系汽車零件供應鏈斷裂,令到基數特別低。雖然以此比較有取巧之嫌,但今年內地汽車銷量仍應有單位數增長,每年賣車1,800萬部,全世界車廠都以中國客戶喜好為依歸。

買車股好有選擇性,舊年最掂嘅當然係賣寶馬嘅華晨(01114),今年貴價車嘅增長放緩,連帶大昌行(01828)在內嘅汽車代理股亦大幅回吐,國產車長汽(02333)及吉汽(00175)取而代之,最主要多得公務車要全部用國產車政策,長汽今日除息前再升6%。

東風(00489)一向穩穩陣陣,皆因合營多、車款多兼乜類型都有,等如車股當中嘅綜合性企業,加埋預測PE得八倍幾,雖然唔可以好似細車企有突破性增長,但憑藉內地汽車市場未來自然增長,加上與更多外國車廠合作生產,其增長能力也毋須懷疑。

東風首季少賺5.4%,但全年可以恢復增長,原因係舊年某程度受日本汽車零件短缺影響。如果想投資內地汽車市場,又唔想買其他大起大落嘅車股,東風肯定係不二之選;如果唔太貪心,13到15蚊炒上落亦相當唔錯。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

史提芬