股海實戰：國航不妨分注收集

港股前日急跌過後，尋日曾嘗試反彈不果，恒指最終收報20,484點，跌51點，成交降至451億元。顯然現水平願意入場買貨嘅人唔多，當大家都等待跌至兩萬點才入市，後市有兩個可能性，一係就唔使落到兩萬點已經掉頭回升，另一可能係兩萬點並非本輪調整支持位，通道底部將向19,000點水平下移。

港交所（00388）首季業績表面略優於市場預期，但其實主要由投資公平值收益淨額增加帶動，加上競投LME一事仍不明朗，故見大部分券商評價偏向負面。現價一二年預測市盈率達二十六倍，仍高於長期平均的二十二倍，估值欠吸引力。

民豐威士客中伏

富人去晒債市避險，股市水盡鵝飛，即使大戶再質低指數，相信唔會收到幾多平貨，但舞高又冇人肯跟，結果就係唔上唔落。大淡市二、三線股如處北極寒冬，股價浸浸落，惡性循環下成交萎縮，唔小心中伏，想走貨都幾艱難！

阿莊最近就聽到兩個股友炒細價股損手嘅例子，其中一隻係民豐企業（00279），最近先合股然後供股，上月供股權交易時，股友見供股權價格計及供股價（0.1元）與正股價相比曾現大折讓，以為有「筍」價上車，誰知尋日隻股急插38%，收報9.3仙，跌穿供股價，本周五供股出街股價會點，大家心中有數。

另一例子係第一視頻（00082），公司十送一紅股喺五月二日除淨，四月下旬以來其股價一直企喺1元水平，買入揸到五月三日即刻沽出還可，沽遲一日，公司即以折讓價配股集資，股價插水，尋日低位見0.89元唔好彩買中，真係輸錢兼換來一肚火！

相比之下，留意實力股表現捕捉炒上落機會，也許風險較低而勝算亦較高。喺中資航空股中，中國國航（00753）向以財政實力、航線分布同盈利能力取勝，但今年首季純利仍要急挫逾八成至2.39億元人民幣，反映喺油價高企及全球經濟增長放緩下，行業經營困難，加上人民幣升值預期降溫，亦拖低板塊估值。

不過，上月國航獲母公司注入資本，有助穩定投資者信心。阿莊相信，雖然次季油價回落，但航空運輸需求仍未明顯復甦，次季營運仍處低潮，第三季才有望走出谷底，屆時會有更多資料可供判斷歐、美經濟回穩，加上七、八月倫敦奧運可帶動國際航線需求，而內地宏調逐步到位，全年經濟有望前低後高，國內航線需求可望回升。故總括而言，呢一刻買貨唔使急，等回試5至5.5元承接區再分注收集，主要阻力區喺6.5至6.6元。

Tip股我至Top

Sammi（5/7）Tip

創生控股（00325）

最多升10%

積奇（5/2）Tip

越秀地產（00123）

最多升7%