干諾道商廈近50億貴絕

近期中資銀行等積極喺香港搵全幢商廈做總部，不過本港商廈供應已經非常短缺，數埋都無幾多幢可以賣，早前傳出獲中資銀行洽購嘅中環干諾道中50號全幢，終於成功以48.8億元賣出，每呎做價接近2.8萬元，以單一全幢落成商廈計，係本港歷來最大宗商廈交易。

樂聲電子（00213）尋日發出通告，由該公司擁有20%權益嘅聯營公司僑亮有限公司，與獨立第三方簽訂臨時買賣協議，以總代價48.8億元出售干諾道中50號全幢畀後者，買賣雙方將响本月十四日或以前訂立正式買賣協議，預期下月二十五日或其他雙方同意嘅日期完成交易。

劉Sir發現張通告最終未有提及買家係邊個，市場就話係四大中資銀行之一，但打咗去工行（01398）同農行（01288）查詢，都未有回覆。

逾80%租出 回報3.8厘

空穴來風未必無因，事關幾個月前建行香港地產啱啱先以約25.1億元同信置（00083）買咗九龍灣宏照道東滙18全幢商廈。代理老友美聯工商舖翁鴻祥話，再錄得巨額全幢成交，反映市場對本港寫字樓好有信心，大額資金都願意來港停泊買貨。

佢話以干諾道中50號全幢嘅總樓面約17.5萬方呎計，呎價高近2.8萬元，貼近舊年皇后大道中九號錄得嘅全港呎價最高。同時物業超過八成樓面已租出，租值回報近3.8厘，認為今次成交屬合理價，因本港寫字樓租金一直平穩向上，相信買家對後市非常睇好咁話。睇番資料，對上一宗巨額全幢寫字樓成交，係一○年中以約41億元易手嘅上環維德廣場（現為無限極廣場）。

另外據政府差餉物業估價署最新數據，三月份甲級寫字樓租金指數亦見回落，按月跌約0.37%至189.1點，惟同期錄得的整體寫字樓售價指數為303.7點，係自去年十一月後新高。

地舖逾億成交頻現

消息指，中環擺花街雙號地舖，面積約900方呎，市傳由投資者以約1.1億元摸出；另士丹利街雙號地下及一樓，以約1億元易手。消息人士又話，旺角奶路臣街單號地下以1.4億元成交。高力國際話，首季中環、銅鑼灣等一線區舖位租金已按季升咗5.3%，料未來一年再升約12%。