Fundman睇市：睇好A股中信証券夠正路

周一為基金月結日，撞啱五．一假期前夕，港股成交奀奀哋之下，順利畀基金經理粉飾機會，四月港股以收市新高作結，周一在426億元成交下恒指升352點，計落億二銀成交有1點進帳，唔用「乾挾」，筆者都搵唔到第二個更貼切的形容詞。

今個星期，其實唔少不明朗因素，先有中國四月份PMI，周五有美國就業數據，周日法國總統選舉第二輪投票，薩爾科齊一旦落台，換上左翼的社會黨候選人奧朗德，薩爾科齊提出的法國財政紀律計劃，好可能胎死腹中，法國再被貸評機構打毒針機會唔細。

儘管危機四伏，市場偏偏選擇性地樂觀，尤其是美股，三月份新增職位遠少過預期，唔理，三月耐用品定單急跌，又唔理，聯儲局上星期議息對QE3隻字不提，都唔理，華爾街猶如伯南克小粉絲一樣，經濟數據愈差，對QE憧憬愈大，美股愈強，美匯指數更係當正真係有QE一樣，聯儲局未出招美元自己散住先，美匯指數營造頭肩頂，周一跌穿79水平，一旦再破78頸線，走勢派話今次要返到去年十月的74水平。對於美股走勢，近期筆者都自問投晒降，明顯的轉勢之前，一切的做淡都應該暫時鳴金收兵。

中央托市意圖明顯

中國公布的四月份PMI升至53.3，但稍低於市場預期的53.5，21個製造業行業之中，有16個行業PMI高於50，反映人行三月份積極透過銀行提供流動性的舉動，開始對實體經濟發揮作用。

內地證監研究減低股票交易費用，以刺激交投，中央希望透過種種手段，例如增加QFII額度、擴大社會保障基金投資股市規模，到再用○八年的老招數，以減低交易成本提高入市誘因，托市的意圖已十分明顯。有趣的是，近期內地保險股公布的業績，大都令市場為之失望，除了有銀行業務充撐的平保（02318），首季有4.3%增長外，國壽（02628）首季業績倒退29%，新貴的新華保險（01336）倒退36%，更甚的是太保（02601）業績大跌81%，保費收入放緩，本來市場大條道理可以糟質幾隻內險股，然而，他們的股價卻未如預期般被看淡。

過去一個月，華保升了10.7%，平保升10.6%，國壽升4.2%，連太保都有5.4%進帳。說穿了，市場對中央第一季末開始擴大放水規模，支持經濟，股市可能見底，惠及幾隻保險股，未來幾季投資收入可能由首季的谷底中復甦，趁壞消息出盡炒起股價。

目前A股估值處於歷史最低位，預期市盈率大約十倍左右，押注A股指數與成交將會出現死貓彈，其實風險有限，保險股只係間接希望他們的投資得益，倒不如看看一個被忽視的板塊券商股，像中信証券（06030），早前公布首季業績倒退36%至8.63億元人民幣，有可能是年內最差表現的一季，也因此股價未有太大震盪，假如看好A股成交回升，上市費用見底，相比有其他困難的保險股，受惠程度可能來得更加直接。