股海實戰：中煤能源小注一試

近期內地財金部門動作多多，如下調期貨及股票交易費用，就新股發行改革發指導意見，以及就滬、深主板及中小板嘅退市制度徵求意見稿，種種改革長遠對A股發展有利，但短期內刺激作用未必會太大，就以減股票交易費用而言，買股票首要係睇投資回報而唔係交易費用多少，A股要大翻身，最終取決於基本因素，直接啲講係宏調幾時完結、阿爺幾時再放水﹗

尋日澳洲央行一如預期減息，但幅度大於預期，達半厘，反映面對當地經濟明顯轉弱，澳洲政府落藥絕不手軟。另外，內地公布四月份中國製造業PMI為53.3，已連續五個月回升，按月上升0.2個百分點，且高於去年同期水平，反映經濟增長動力正呈穩步回升。本周尚餘嘅市場焦點包括中美經濟對話、歐洲央行議息結果及美國就業數據。

前日港股率先突破21,000點收市，唔排除係預先反映內地經濟數據，故今日復市未必係睇升幾多，而係睇企唔企得穩21,000點樓上。騰訊（00700）股價迭創新高，而滙控（00005）亦喺過去一個月以來首次重上70元樓上收市，由於10日線剛重上250日線，技術走勢有改善，若短線確認突破二月以來嘅主要阻力位72元，下一反彈目標乃回補去年八月上旬嘅下跌裂口位73.3至75.75元。

數碼通睇位博反彈

國美電器（00493）上周五遭大盤質低，原因眾說紛紜，直到前日收市後傳來盈警消息，才明白係基金大戶聞風先遁，由於股價才剛破底，撈貨別心急。另一隻被連日殺落嘅數碼通（00315），周一再跌4.7%，14日RSI落到27，照計短線落到250日線13.93元，出現技術反彈機會大，不妨𥄫實相關水位。

前日見報推介嘅廣州藥業（00874），當日開市回吐壓力唔大，加上見指數挾高，遂以均價7.45元跟進三萬股短炒一轉。另一隻值得留意嘅中煤能源（01898），前日股價以大成交衝上8.91元收市。近月秦皇島港煤庫存量下降，用電量進入旺季，企業定單回升帶動製造業用電需求，煤價有望穩中有升，唔排除次季電力及煤炭股係大戶部署嘅焦點。中煤14日RSI呈突破，小注一試，下兩個阻力位喺50日線9.26元及250日線9.58元，回吐宜守10日線8.68元。

Tip股我至Top

暴炒男（4/23）Tip

光大國際（00257）

最多升11%

李偉傑（4/24）Tip

華能國際（00902）

最多升8%