檈市出更：舊樓重建爭到天台

近幾年灣仔處處都可以見到重建地盤，尤其係喺港鐵站同新建商廈附近嘅舊樓，更加係財團收購目標，舊樓價值自然水漲船高；劉Sir收到風，喺正太古廣場3期對面嘅永豐街31號一幢單邊舊樓，上面天台攞出嚟招標，相信會吸引唔少財團興趣。

劉Sir發現，啱啱拎出嚟招標嘅天台，其下面地下至6樓大部分單位喺幾年前都先後錄到成交，買家仲係同一家公司，相信物業業權都幾集中。

睇番個天台有關招標資料，永豐街31號天台係承遺產管理人命推出招標，日前委託咗測量師行及律師行出售，截標日期係今年五月八日。有代理話，上述天台料低於600方呎左右，依家只係擺咗幾支電視「魚骨」天線，未有任何上蓋。

財團密購爭業權

負責是次招標嘅律師行無講到上址意向價多少，不過，睇番土地註冊處資料，原來幢樓地下喺○四年九月錄到成交，金額約350萬元，而樓上多層都同一時間喺○七年錄得成交，金額都係440萬元，而上述成交買家都係同一間公司，相信該批物業最終持有人都係相關人士。

喺幢舊樓地下一間餐飲工作嘅Xyza就話，由於附近愈來愈旺，若果日後大廈搞重建，相信老闆會喺附近再搵新址。

相信幢舊樓嘅天台都佔一定業權份數，若然有心人諗住全幢統一業權嘅話，務必積極奪得是次招標嘅天台。

對面申重建甲廈

由於永豐街與港鐵金鐘站只一街之隔，對外交通極為方便，加上隔籬就係甲級寫字樓太古廣場3期，以及星域軒，無論係上班一族，抑或係住客都係消費力較高嘅一群，所以條街舊樓重建價值好高。而幢舊樓對面，太古早前就申請將永豐大廈同埋永豪閣等樓面，申請重建一幢大約27層高甲級商廈。

中環愈來愈多名店，唔少區內業主伺機招租，中原黃國柱報料，威靈頓街43至49號新利大廈地下C舖本來由時裝店租用，剛交吉，面積800方呎，業主叫租每月28萬元，同舊租比，加咗差唔多一倍。