股海實戰：重汽重拾上升動力

聯儲局會議前，市場觀望氣氛濃，尋日恒指上落都唔過百點，成交420億元，卜架房靜到連烏蠅飛過都聽到。

今年首季，魚缸炒家一大浩劫，就係民企風波。數得出已停牌嘅有寶姿（00589）、大慶（01007）、博士蛙（01698）、澳優（01717）、歲寶（00312）、瑞金（00246）、超大（00682），尋日輪到華寶（00336）。最慘唔少出事民企股，停牌前都炒過一輪，突然拉閘，唔少炒家「中伏」，組合持倉部分市值頓時變零，炒作實力自然大打折扣。經此一劫，炒家被迫「瘦身」，加埋去年末季以來北水同外資一去不返，致造就出今日嘅「超級悶局」﹗

民企續成空襲對象

前身係民企，依家經已收歸首鋼旗下嘅首鋼資源（00639），亦被來意不善嘅「報告」質疑，但公司已一再否認，尋日股價亦算硬淨，顯見泊了大碼頭係撐得住吓。淡市中大鱷們搵食方法不外乎係做「空軍」，有心人針對民企板塊不斷發掘負面消息做嘢已成潮流，估計喺市場流動性真正好轉前，尚有民企成「襲擊」對象，唔想受拖累，最佳辦法當然係避之則吉；繼續參與嘅，就緊記食得鹹魚抵得渴，仲有六字錦囊：「唔過夜，忌瞓身」﹗

異動股方面，見重汽（03808）表現唔錯，股價逆市升4%，收報4.62元，成交1,297萬元，圖表顯示圓底回升趨勢已形成，可以望多兩眼。

本月中旬，重汽旗下A股附屬濟南卡車發盈警。事實上，首季內地經濟增長放緩，企業盈利倒退喺預期之內，故消息雖然負面，但重汽股價企穩喺4.1元水平，上周更重返10日線之上，且成交有所增加。阿莊相信，次季政府會加大力度推動基建投資，以抵銷外資熱錢退潮以及內房調控持續嘅影響，企業經營環境可望逐步改善。重汽亦努力捕捉天然氣重卡市場商機，其天然氣重卡銷量，已由一○年嘅517輛，增至去年嘅1,166輛，而今年首季定單已達658輛，另本月公司更成為首家進入上海市場嘅LNG車輛生產商。至於出口業務方面，公司剛取得巴西兩千輛歐五重卡定單，整體發展勢頭確有改善。

如無意外，首季好可能係重汽業務周期低點，未來三季將漸見好轉，股價有望重現活力，暫看是浪反彈較大阻力喺5元關，10日線支持喺4.33元。

Tip股我至Top

錢進（4/24）Tip中石化冠德（00934）最多升11%

藺俠（4/17）Tip中銀法巴購（12485）最多升9%