Fundman睇市：中移有力企穩80元

殺一儆百，證監以危害投資者利益為理由，破天荒出動到極刑釘牌兼罰款4,200萬元，將協助洪良（00946）上市的保薦行兆豐資本連根拔起。不過近兩個月民企出事頻頻，已中伏股民惟有嘆一句，樣板戲遲到好過無到！超過八成去年上市公司，股價一年內破發。事實上，私募基金注資，到保薦人協助上市，幾多公司期間被打補針催谷，大家心知肚明，唔少公司到最後一步IPO落到股民手上，高增長的秀麗圖畫早已開始褪色。

今次證監打紙老虎，但真正大型保薦行有完善制度同強勁律師團隊，要動一根毛髮都難，證監可以執正上市程序，但唔可以保證賓架們的道德操守，股民只能信自己，嫌煩嘅索性唔好買上市未夠三年股票，定必可以食少多覺瞓。

放水仍欠足夠理據

之前傳到似層層，但人行上周末始終未見減存備金率，好友難免有點失落，早段港股低開幾十點，押注內地放水的缸邊客，唔少仲冀望十時半出籠的滙豐四月中國PMI數據唔好，加強中央放水的決心，最後數字出來是49.1，稍高於三月的48.3，不過仍低過50的盛衰分界線，無論炒救經濟放水，定係賭中國經濟第一季見底反彈的死硬派，都搵唔到足夠理據支持。

歐元區四月PMI跌到三年新低，全世界經濟火車頭都齊齊歎慢板，港股收市前也愈跌愈多，最終跌386點，收20,624點，主板成交縮到得435億元，是一月十六日以來最低紀錄。大孖沙選擇靠邊站，任由大市free fall，明顯係見短期不明朗因素太多，美國周內公布第一季GDP，估計由去年第四季的3%，回落到2.5至2.6%，但顯然未足以打動聯儲局，在周中議息時再預告QE3不日上映。

跌市元兇中移（00941）尋日急挫2.65元，收84.8元，沽壓主要由分析員對首季業績唔滿意所引發。但史提芬認為，上周五中移股價創今年新高，大戶借消息踩一腳，在期指市場上下其手，先至係真正原因（昨現貨同期指成交額明顯背馳）。

中移首季賺278億元（人民幣．下同），按年升3.5%，比大行預測的281至288億元差3億元左右先觸及下限，但就因為呢區區3億元，市值一日就蒸發咗532億港元！

剔除上海浦東開發銀行貢獻，中移核心收益實際升2.8%，ARPU及MOU（每月每戶平均消費及每月每戶使用量）分別按年微跌3%及1.7%，至65元及508分鐘。不過，數據使用量有17.7%的按季升幅，畀人感覺是營運數據唔算標青，但也不至於跳船逃生。尤其大家明白，中移先天不足，要自行研發TD網絡，目前手機支援明顯不及聯通（00762）的WCDMA下，捱打是必然，業績未來兩年維持2至3%增長，維持4厘股息以上，比雞肋一樣唔到2厘的美債好，股價唔難在80至88港元浮沉，好等候TD制式成熟，更多手機供應商支援TD網絡的一日來臨。