股海實戰：東風基本因素紮實

中移（00941）首季業績遜預期觸發沽壓，股價回落逾3%，加上上周末降存備率的傳聞落空，恒指尋日由頭跌到落尾，全日跌386點，收報20,624點，交投持續淡靜，全日成交僅437億元。受經濟數據欠佳及政治不明朗因素影響，執筆時歐股大散。外圍山雨欲來，看官要戴好安全帶！

中國四月滙豐製造業PMI預測值為49.1，較上月終值48.3有所反彈，四月份終值將於五月二日公布。數據正反映去年末季以來實施嘅「微調」措施發揮作用，次季微調繼續，降存備率呼之欲出，料「五一」假前後有定案。

文化中國可留意

尋日提到文化中國傳播（01060），聽卜架講，近日公司透過公關發稿，話今年首四個月取得理想嘅發展，喺浙江及深圳播映嘅兩套電視劇收得，料可為本年度帶來不俗嘅收入貢獻，而繼去年與騰訊（00700）建立戰略夥伴關係後，雙方正緊密合作。公司咁主動披露經營情況，近兩個交易日交投改善，可納入觀察名單。

車股個別發展，長城汽車（02333）尋日股價逆市創新高，見16.96元；廣汽（02238）股價亦逆市靠穩；惟東風集團（00489）則跌2.3%，收報14.44元。今年，東風嘅汽車銷售目標係245萬至250萬輛，較去年上升約12.9%。據集團公布嘅數字，估計其首季汽車銷售約58.9萬輛，佔全年銷售目標約24%，同比增幅為6.3%。若然首季銷售逐步回暖嘅趨勢喺次季延續，應有能力實現全年銷售目標。

事實上，未來公司將專注拓展增長較快嘅二、三線城市市場，加上原材料價格已由高位回落，現價往績市盈率9.8倍，論基本因素可以話係四平八穩。見其股價自三月下旬低位13.08元反彈至上周高位15.16元現回吐，現處10日線附近，技術上10日線正醞釀突破50日線，短線調整企穩14元樓上可作中線持有，向上睇16.5元，250日線支持喺13.4元。

順帶一提，信義玻璃（00868）尋日隨大市回落，幸成交縮減，短線企穩50日線4.76元樓上可續持有，否則要有所提防。

Tip股我至Top

Sammi（4/19）Tip鉑陽太陽能（00566）最多升13%

藺俠（4/23）Tip港交中銀沽（14837）最多升9%