樓市出更：地廠劏舖回報16厘

近幾年唔少本港老牌工業區都轉型，好似火炭咁，依家好多豪宅新盤已經入伙，有投資者就靈機一觸，將兩年前買番嚟嘅威力工業中心過萬方呎地廠大變身，向政府支付「容忍費」改做零售，劏成約莫50個商舖出租，全包月租低至3,600元有交易，咁嘅價喺區內租個地廠都好難，每月租金收入有近30萬元，回報差唔多16厘。

美聯工商高級營業經理黎紹賢（Eric）同劉Sir講，依幾年火炭變化好大，東鐵火炭站豪宅新盤相繼入伙，睇番附近大型商場唔多，所以唔少便利店同新式食店都喺距離該站最近嘅坳背灣街租舖。

有個投資者就睇中威力工業中心距離東鐵火炭站只約五分鐘，兩年前一擲近2,240萬元交吉購入上述地廠，一直唔甘心出租作工業用，已經諗定將單位大變身，以提高租值。

月租3600幫人創業

Eric話，個地廠面積差唔多10,135方呎，業主早前已經入紙政府申請暫時改作零售用途，相信可以短期內獲批，依家連個名都諗定，叫做「威力創意廣場」，睇個名都略知一二佢係想幫啲本港創意行業，所以部分舖位租金3,600元左右有交易，最貴嗰個三相連舖，面積大約2,000方呎，月租都係大約5萬元，整體而言，該50個舖平均呎租大約20元。

依家個場已經預租咗大約10個舖，最快下月中可以陸續開業，Eric話，預計成個場租晒每月收租約近30萬元，比起齋租畀工廈客，每月只係有約20萬元租金，依家每月租金可以多出約五成。

事實上，火炭未來將有全新面目，除了爪哇控股（00251）嘅惠康倉擬建4幢住宅大樓，而華潤創業（00291）嘅百適一倉同沙田冷倉一倉亦計劃改做酒店，所以區內未來將唔難成為另一商住新興區。