魚缸Blogger：光大國際短炒一轉
港股上周累升309點，雖然日均成交得509億元，但當中仍有唔少搵食機會，至於今個禮拜，就要（目及）實市場對法國總統大選結果嘅解讀，大行唔同嘅睇法，隨時左右後市走勢。
受重慶風暴波及，光大國際（00257）近周股價曾低見3.15元，不過該股上周五尾市突然異動，暴升逾11%兼抽穿三條主要移動平均線收市，且股份基本因素紮實，短線不妨跟走一轉。
主營環保水務同垃圾發電等業務嘅光大國際，舊年純利按年升近三成，加上「十二五」扶持再生能源，料集團早前積極投資嘅環保項目將步入收成期，配合上周五超賣反彈，應有條件再上，阻力先睇4蚊。
光大國際（00257）
阻力位：4.00元
支持位：3.55元