股海實戰:第一視頻熱身起跑

上周恒指唔聲唔聲經已重上21,000點樓上,但交投仍然不振。市場對阿爺放水存希望,但咁樣只係令淡友有所顧忌,而未足以令參與者一致轉揸好倉而落場大手掃貨,結果買賣兩閒,魚缸死寂。

滬綜指上周五重上2,400點樓上收市,市場預炒降準好消息,港股內險及內銀股價現承接,但論升勢,則以中移(00941)表現較突出,上周五創自○九年八月中旬以來即市高位,收報87.45元,升1.5%,亦平了今年以來的收市高位。

空軍瞄準港交所

港股成交冇起色,大摩調低港交所(00388)目標價。雖然有指港交所擬競投海外交易所,又話下半年在港推期貨夜市及離岸人民幣期貨,但遠水難救近火,次季冇起色,即係中報冇運行,見上周四、五其沽空比率分別升至52%及38.5%,空軍做嘢,炒作相關衍生工具者宜注意風險。

內地人民網發行A股以下限定價,本周五掛牌,定價相等於發行後市盈率四十六倍,咁嘅估值有冇得炒?換着市場資金充裕,單係「人民網」三隻字都夠炒個不易樂乎,但如今A股回歸理性,照計炒極都有個譜。之不過,見到近期港股新興文化產業之首嘅騰訊(00700)股價迭創新高,上周五連細價股文化中國傳播(01060)同文化傳信(00343)都有異動,成唔成氣候,相信會係本周炒家焦點之一。

咁啱本周二開始,中移在港開始推出4G計劃,網絡傳輸速度愈來愈快,費用合理,最終不僅會帶動網絡營運商嘅增值服務收入,更為網絡廣告商及內容服務供應商提供龐大商機。就睇睇本周兩地流動通訊與新興文化產業板塊能否「撻」着,鑊鏟一族可𥄫實從事電訊媒體、彩票相關以及網絡遊戲業務嘅第一視頻(00082),股價由上月初高位1.37元反覆回落至本月低位0.98元止跌回升,上周成交有所增加,不排除是賽前熱身,短線若能升穿50日線1.16元,是浪目標反覆向1.3元推進,跌穿10日線1.05元止蝕。

Tip股我至Top

阿May(4/16)Tip維達(03331)最多升8%

積奇(4/20)Tip中聚電池(00729)最多升7%

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

阿莊

人民網掛牌在即,流動通訊相關股份蠢蠢欲動,第一視頻值得留意。(資料圖片)