樓市出更:淺水灣地破硬頂

政府上財政年度推出嘅最後兩幅土地,將會喺今個禮拜五截標,講到最矚目就梗係淺水灣道近110號豪宅地,因為市區豪宅靚地已經所餘無幾,劉Sir寫包單幅地一定「爭崩頭」,市場估計每方呎樓面地價最高達約4.5萬元,有機會打破政府歷來賣地呎價最高紀錄。至於同日截標嘅屯門小欖冠發街住宅地相對「無乜睇頭」,估值最高都係1.94億元。

隨住壽臣山深水灣徑8至12號豪宅地早前被財團勾出後,劉Sir發現,原來勾地表入面已經無晒港島區低密度豪宅地供應,相信會有助刺激發展商競投上述淺水灣道地皮嘅決心。

測量師估18.9億成交

事實上,塊地質素真係唔錯,地政總署資料顯示,該地佔地大約46,717方呎,可建樓面約42,045方呎。

芸芸測量師當中,以美聯測量師行林子彬睇得最好,佢估計地皮成交價約18.9億元,即每方呎樓面地價約4.5萬元。

據劉Sir所知,4.5萬元樓面地價係「前無古人」,即係話,如果地皮真係以呢口價成交,就會打破○六年山頂加列山道12號錄得嘅42,195元紀錄,成為政府歷來賣地最貴呎價嘅地皮。

高緯環球張翹楚同劉Sir講,樓市表現確係回勇,但對發展商嚟講實際交投量唔算太多,故未有調整地皮估值,其中淺水灣道豪宅地維持樓面地價約4萬元。不過佢強調,地皮仍然屬於絕無僅有嘅市區靚地,相信競投都會幾激烈。

屯門地每呎料僅五千

上述屯門住宅地相對下比較「失色」,可建樓面38,837方呎,張氏估計地皮每方呎樓面地價約5,000元,估值約1.94億元。劉Sir認為,今次兩幅檔次相差咁遠嘅地皮一齊推出,焦點一定落入淺水灣道豪宅地。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

淺水灣道近一百一十號地皮屬市區罕有豪宅地供應,競投勢激烈。(資料圖片)