股海實戰：中聯重科看高一線

港股上周先苦後甜，恒指跌至20,000點邊緣後強力反彈，主要基於意西長債孳息回落及中國放水預期，就算上周五中國公布首季GDP令人跌眼鏡，僅增長8.1%，但恒指稍一回軟即重上高位，全日升373點，成交更增至618億元。經濟愈危就愈需要放水去刺激，三月新增貸款突然急升至1萬億人民幣便是一例，所以預測第二季扭開水喉亦正常。內銀股隨即翻生，中信行（00998）、農行（01288）及重農行（03618）分別急升5至6%。

提防炒高抽水

港股最令投資者憂慮係抽水潮，上周五有申洲（02313）同達芙妮（00210）抽高完跟住批股，所以高追急升股隨時踩中地雷。無故大跌兼創新低亦有中國動向（03818），民企股除會隨時成為空軍目標之外，業績亦可能會大走樣，曾幾何時講到前景如何美好嘅手機股亦會斷線，其實舊年嘅中國無線（02369）已係教訓，如果再在TCL通訊（02618）中伏則屬咎由自取。

中國上周五除公布GDP之外，首季社會消費品零售總額亦令人失望，扣除價格升幅之後僅增長10.9%，但城鎮固定資產投資仍名義增長20.9%，房地產開發投資名義增長23.5%，雖然計增幅仍然明顯回落，但其實唔算差。中聯重科（01157）今年股價由低位回升五成，除咗一一年業績對辦之外，管理層預期今年銷售目標增長35%，令到投資者印象大為改觀，德銀、摩根大通、Blackrock先後增持。

中聯重科計劃以32億人民幣出售環衞機械股權曾引起不少爭議，因該子公司去年經營溢利升幅高達55%，但管理層認為環衞發展將遇樽頸，套現資金用以發展塔式起重機更有前景。資金明顯對該股特別青睞，早前跌穿10元後急速反彈，今年應可續跑贏大市。

Tip股我至Top

黃敏碩（4/11）Tip

新秀麗（01910）

最多升9%

姚午齊（4/11）Tip

百麗國際（01880）

最多升9%