樓市出更：地膽變身居屋收租王

買樓收租係息口低下嘅熱門投資之選，個別投資者更識得為單位增值，好似近年活躍於天水圍嘅一個資深投資者，就專買居屋收租，近年更以約30萬為其持有的天祐苑單位「裝身」，將單位一分為二，加入豪裝，每月回報超過10厘。

呢位天水圍居屋資深投資者盧育林同劉Sir傾開，佢「沙士」後玩過舖位，到○八年金融海嘯後，發覺當時六、七十萬已經可以買間居屋，樓價低水，仲有排都未追到九七價，加埋西鐵效應，區內未來住樓需求強勁，即轉玩天水圍居屋，至今買入賣出加埋都有十幾間。

一分二 配全屋家電

曾經做過裝修生意嘅佢，識得幫單位「裝身」增值，日前佢帶劉Sir參觀佢間天祐苑單位，呢個單位佢前幾年僅用110萬買入，之後用咗30萬裝修，同時將單位一分為二，加埋全屋家電，一個鐵閘內兩道木門，簡直同兩個單位冇分別，依家兩個單位每間以月租約5,000元租出，總月租約1萬，回報逾10厘，係天水圍回報最高居屋單位。

佢仲話，和諧式居屋間隔四正就最好間，但唔好貪，切忌間得太多，持有嘅天祐苑單位曾經以超過190萬放盤，但由於單位租金理想，所以最終封咗盤，但呢類分間單位，通常只有投資者至識貨，故唔會成日做呢種裝修。

買樓投資首要好租

佢又話，吸取咗九七教訓，買樓最緊要好租，睇番居屋啲管理費、差餉都平過私樓，回報當然較高。除咗上面間「豪版」天祐苑外，佢仲揸住4間天盛苑居屋，收緊租或者自用，每個回報均有約4至5厘。

由樓價數十萬買到依家過百萬，盧氏同劉Sir講曾於低價入市嘅佢，實在難過自己心理關口，以前幾十萬買到嘅樓，依家賣到百幾二百萬，短期暫時唔會入市；之不過，港紙繼續貶值、高通脹、投資渠道又少，估計天水圍樓價未來三年可再升約三成。