Fundman睇市：資訊不對等明搵散戶笨

意大利、西班牙兩隻歐豬長債息由二、三月低位持續反彈，兩輪長期再融資操作（LTRO）威力在潮退當中，以往炒第四季業績餘溫，四月股市升多跌少，乃基金搵食月份，故有「sell in May，go away！」的順口溜，不過，去年下半年歐債危機水深火熱，歐美股市近日級級落，或者今年要改改口，「sell in April，go away！」

三月下旬開始港股明顯轉弱，成交愈玩愈縮唔在講，仲跌多升少，十五個交易日跌了十一日。假後復市，連日來美國就業數據唔好，中國通脹高於預期，加埋追補歐美股市跌幅，大家有晒心理準備港股要低開，意想不到嘅反而係好友反撲力度極弱，指數低位彈唔到兩百點又腳軟，連內地公布三月份外貿回到輕微順差，A股跌轉升，亦於事無補。

相信一來係唔少芬佬仲未放完假歸位，其次新一份衝着民企而來的渾水報告，講到似層層一至兩星期內曝光，如非膽生毛，難有勇氣博個別超賣二三線股反彈，事關一旦拉閘上嚟，隨時為粒糖輸間廠。但話說回頭，既然渾水夠「吉士」事先張揚，賓架亦不妨趁靜市無聊玩吓捉鬼，開個Excel計計。儘管不知道net short sell有幾多，但至少睇番近兩三個月沽空多寡，整個「輸突拉」名單自娛一下，亦無傷大雅。

話時話，港交所（00388）與其搞延長交易時段，逼到大家消化不良兼悶多個半鐘，倒不如投放資源提升資訊透明度。舉個例，今時今日對沖基金大舉東來，但香港連股份累積沽空數字，都只係得幾間主要借貨行操盤部掌握，資訊完全不對等，散戶未玩先輸，完全處於劣勢，試問點會對魚缸產生興趣？難怪刺激成交的目標，只會愈走愈遠。

瑞聲備受大行青睞

早兩日，坊間繪影繪聲話蘋果公司已將iPhone5及7吋iPad mini的初部原型機種，交付代工商試產，規格包括4吋Mon、A5X處理器、Liquid Metal外殼等。貴為全球最大市值的巨無霸，當然好多人跟住消息搵食。台灣最多相關零部件及代工商，iPhone5及7吋iPad mini同現有產品的最大分別，是屏幕尺碼變大，近兩日高端面板生產商奇美電（TT3481）及友達（TT2409）備受炒家追捧。港股中，飲到蘋果公司奶水的唔多，昨瑞聲（02018）逆市升兩格，中段更見過五十二周高位，看來尋寶的果粉芬佬，對幫iPhone及iPad生產微型喇叭的瑞聲，食指大動。

去年瑞聲盈利得5%增長，計落22.9倍往績市盈率唔算平。不過，買股票係睇未來而唔係睇過去，管理層見完分析員，發出上半年銷售指引，大行普遍睇今、明兩年業績睇得幾好，16間大行有13間調高今年盈利預測，平均去到14.97億元，增長44.5%，一二年市盈率回到15.7倍，抵唔抵見仁見智，但蘋果美國股價日日創新高，前晚逆市升至636美元，有分析員目標價唱到1,000美元，音樂椅遊戲幾時完無人知，但成個市可以炒作的故事唔多，短期內瑞聲會係唔錯的安全之選。