股海實戰：一拖買定貨等收成

恒指昨日跌幅細過ADR，但A股由下晝開始V形反彈，港股卻彈完又散，令人傷心。圖表走勢亦甚差，成個圓頂走勢創兩個多月收市低位；至於外圍反而唔係咁擔心，美國經濟數據差重燃QE3希望，美元及債券價格已先反映QE3憧憬。話時話，專家早批死美國今年中會推QE3，皆因QE藥效短暫，所以待年尾總統大選前幾個月推出就啱數；而同QE2一樣，醞釀推出前經濟數據會突然走樣，到正式QE後又會立竿見影，看來數據有水分，並非我哋祖國所獨有。

港股放完假成交依然淡靜，內地接連公布CPI、PPI及進出口數據亦變成小菜一碟，呢個星期五公布嘅GDP先係主菜，唔少外資唱衰今年中國經濟，但早前發改委有預測指今年首季GDP有8.5%，加上對中國經濟「跌眼鏡」已習以為常，之前官方PMI亦有好大驚喜，至於信與不信，則是另一回事。

渾水嚇窒民企股

道指失守萬三點及50日線後風險增加，美國企業業績期將於今個禮拜由美鋁揭開序幕，中鋁（02600）股價將受影響，至於中聯重科（01157）則睇住Caterpillar。傳聞渾水將於本周出招，一眾民企股聞風腳軟，「散戶愛股」旭光（00067）、國美（00493）、熔盛（01101）齊令「粉絲」心碎。民企太多蠱惑嘢，一時話獲得大定單，一時話注入新業務，一時話營業額急升，無非引君入甕。買國企股起碼冇咁多顧慮，出咗事亦有阿爺照，所以溫總前排鬧銀行賺取暴利目的只係做場戲。試問民間借貸幾十厘息無法無天，豈容放肆？國企涉足多屬壟斷性行業，如銀行、電訊、石油等，至於競爭激烈行業如房地產、零售、工業等，則留畀民間資金參與。

不過，國企股亦要肩負國家使命，阿爺叫你「走出去」焉能不從，所以海外油田幾貴都要買，第一拖拉機（00038）去年買咗間法國廠，結果碰到一鼻子灰，受其拖累下，盈利亦見倒退，中外管理模式大不同，出外闖只係交學費而已。之但係，一拖歷年受阿爺恩惠感激已來不及，小小風雨何足掛齒？年年增加農機補貼簡直係最大德政，去年更提出農機以舊換新，一旦實施，一拖及其股東肯定笑開顏。

今年「一號文件」既以「農業科技」做主題，農機以舊換新可以提高農作效率，以補救農地及農民流失呢個問題，類似基因改造、科學種子、善用農機等作業必不可少，所以農機以舊換新推出只差遲早，現時儲定貨買一拖，等如播定種等收成。

Tip股我至Top

Sammi（3/30）Tip

新秀麗（01910）

最多升17%

暴炒男（3/27）Tip

中國民航信息（00696）

最多升11%