樓市出更：九龍細單位史上最貴

昨日差餉物業估價署公布截至二月底最新數字，就進一步引證小陽春嘅存在，私宅售價指數按月大幅反彈約1.84%至182.4點，係舊年四月後最大升幅；其中中小型單位平均呎價亦全線上升，尤其九龍實用面積431方呎以下細單位，呎價按月升約9.3%至6,620元，創九九年有紀錄以來新高。

劉Sir參考差估署資料，二月私宅售價指數按月升1.84%，各區面積431方呎以下同埋431至752方呎中小型單位呎價全線報捷，升幅由1.1%至10.6%。值得留意係上述九龍區細單位最新呎價6,620元，係該署九九年有紀錄以來新高。

港島大單位升幅最勁

如果單計升幅，就以港島區面積1,076至1,721方呎大單位按月升約10.7%至16,273元最多。其次係九龍面積431至752方呎中小型單位，亦升10.6%至7,731元。

美聯物業首席分析師劉嘉輝同劉Sir解釋，小陽春爆發前累積大批購買力，呢批用家願意追價入市，搶高中小型單位做價。佢仲話，早前政府賣出嘅限呎及限量地，同埋復建居屋等因素已成定局，所以將來中小型單位供應會增加，呢類單位樓價預期會平穩發展。

曼山兩房呎價首破萬

近排細單位做價繼續向上。美聯林海成話，荔枝角曼克頓山6座中層H室，面積747方呎兩房單位，賣咗750萬元，呎價10,040元，首穿一萬大關，仲創兩房新高。東涌物業李順康稱，東涌影岸．紅B座高層F室，售472萬元，呎價6,743元，亦創兩房新高。

至於租金走勢亦唔輸蝕，據差估署資料，二月私宅租金指數按月升0.53%至133.7點，終止連跌三個月頹勢，升幅係舊年六月後最大。利嘉閣稱，50個指標二手屋苑三月平均呎租按月升約1.7%至21.96元，期內成交亦增5.9%至1,230宗。