牛熊對壘：短期未見底吼恒熊61173

內地三月份官方PMI令市場人士跌晒眼鏡，達53.1，遠高過早前滙豐公布的48.1，令人意外。不過，「驚喜」未有沖起港股，恒指昨日開市一刻的20,662點已是全日最高位，其後轉升為跌，尾段跌幅收窄至33點。計埋上周，港股四連跌，圖表上更出現20日線跌穿50日線的情況，短期偏淡的機會較高。

內地連放三日假，香港就卡罅卡罅咁休市，不少經紀、基金經理、交易員等一眾金融圈人士趁長假外遊，無人埋位，市場唔Thinly trade都唔得，成交縮到455億元。

唔多精神的牛熊市場再陷低迷，成交按日跌近四成至41.67億元，窩輪情況不相伯仲，成交按日跌兩成至55.66億元，長假前衍生工具市場例牌靜市。身邊不少股友近日長嗟短嘆，話短期後市唔明朗，大隻股份升唔上，細隻嘅又唔敢掂，因爆煲潮仲未完全過去，只好睇住技術位，採短線買賣策略。

資金流入新地好倉

全日沽空唔算少，有44.7億元，佔成交9.8%，昨日股價企硬的滙控（00005）沽空最多，達2.18億元，佔總沽空4.88%，新地（00016）一度跌至92.35元，收市回順至94.4元，是成交最大的股份，達35億元，沽空都唔少，有1.9億元，相關窩輪成交3.1億元，是最活躍的十大窩輪資產。

上周五新地牛證及Call輪好倉錄得3,854萬元資金流入，同日亦見155萬元資金流入淡倉，昨日據個別輪商統計，資金續流入新地好倉，似乎大家都想小注博Call低撈一下。

上周五另一隻較多資金流入衍生工具好倉的股份是中移（00941），錄得1,030萬元資金流入，股價昨日早段一度衝高至86元後掉頭回落，收市跌0.9元，窩輪成交4.26億元，其9日RSI超過50，超買情況唔算嚴重，可繼續留意。

大市短期有機會再試低位，投資者可考慮小注恒指熊證，恒指瑞信熊（61173）於今年六月二十八日到期，收回點數21,350點，槓桿比率十六倍。