Fundman睇市：做散戶愛股未必有着數

外圍昨日包括日本、美股期指亞洲時段、歐股早段全部做好，但港股仍然無力上升，成個圓頂走勢，雖然20,000點關口好似係鐵底，但呢個禮拜得3日市，加埋A股周一至周三休戰3日，所以短線市況應該都係牛皮偏淡居多。

昨日大市主板成交金額得455億元，恒指雖跌33點，但國指微升18點。期指成交唔夠5萬張，亦為一月五日以來最低紀錄，收市低水62點，後市都係十個牛皮九個淡。

樓市小陽春近尾聲

業績期過後，投資者本來應該做完檢討再入市，不過只係得大跌股有人撈吓貨，新地（00016）再跌2.1%，但其他本地地產股已普遍回升。地產股不外乎計樓價走勢及資產折讓，所以唔少人認為其他地產股只係無妄之災，可以趁低吸納，但上周末樓市成交大減，今年以來嘅「小陽春」或者已係強弩之末。

原本以為業績期過咗，個地雷陣應該可以較為安全，但昨日仍有中播（00471）同華保（00810）延遲派成績表，民企股仍見宇陽（00117）、銀基（00886）、達進（00515）好幾隻流血不止，好在旭光（00067）同金石（01380）等翻生，尤其隻旭光，喺網上股票討論區熱烈到爆燈，可見「散戶愛股」零舍不同凡響，其實旭光喺買PPS業務時發大量新股並引入好多股東，風險的確特別大。

另一散戶愛股第一視頻（00082）早段亦有洗倉驚魂，開市頭半粒鐘曾急插一成幾，好在其後回穩，收市仍跌6.5%。能稱得上「散戶愛股」其實絕對唔值得恭喜，上升時蟹貨重重，下跌時互相踐踏。二月時4日內急升兩倍嘅新時代能源（00166），不經不覺已打回原形，炒細價股最緊要識「快閃」。

內銀股算係比較奇怪嘅板塊，估值堪稱全港最低，息率又高，但一律都升唔起，皆因驚住地方債務同樓市爆煲，二來驚抽水壓力，長線則有「利率市場化」呢個魔咒。內銀股合晒散戶愛股嘅條件，以上所講嘅負面因素，其實大致反映喺股價身上。

9隻內銀不約而同喺舊年第四季增加撥備，無非係為今年不良貸款可能增加先行拆彈，以中信行（00998）為例，不良貸款比率僅0.6%，有排都未到警戒線。今年如無意外會減3至4次RRR，一般認為減RRR實對內銀有利，但舊年正因貸款僧多粥少，所以息率可以吊高來賣，今年減RRR之後貸款可以做多咗生意，但息差則同時收窄，但總括會對大銀行有利。

內銀抽完水例生猛

以抽水壓力來講，幾隻內銀抽水前例牌偏軟，但抽水後反而龍精虎猛，𠵱家剩得農行（01288）同招行（03968）排住隊抽水，集資後可以做多啲生意，其實唔係壞事，之後又有排玩，交行（03328）抽水後走勢就明顯跑贏其他內銀。農行累跌較多，所以博反彈會較有利，該行一二年預測PE僅5.7倍，預測息率則有4.8%。